Biylǵy oqý jylynda Qazaqstannyń oqý oryndarynda 18 myń sheteldik stýdent bilim alyp jatyr, dep habarlaidy QazAqparat agenttigi QR Bilim jáne ǵylym ministrligine silteme jasap.
«Biyl Qazaqstanda 18 myń sheteldik stýdent bilim alyp jatyr. Olardyń kópshiligi Shanhai yntymaqtastyq uiymyna múshe elderden kelgen. Bizdiń maqsatymyz - sheteldik stýdentter sanyn shamamen 40 myńǵa deiin jetkizý. Jyl saiyn 20 protsentke kóbeitip otyrsaq, aldaǵy 5-6 jylda Qazaqstan aitarlyqtai aýqymdy bilim berý habyna ainalady. Ol úshin birneshe sharalar jasaldy: aǵylshyn tilinde sabaq berý, jańa baǵdarlamalar daiyndaý, ýniversitterge akademiialyq derbestik berý. Endi ýniversittiń ózderi jumysqa kirisýi kerek», - dedi ministr ShYU múshe-memleketterdiń bilim ministrleriniń jetinshi keńesinde.
Sonymen birge, ministr Qazaqstannyń meditsinalyq mamandyqtar boiynsha úndistandyq stýdentterdi kóbirek qabyldaýǵa jáne IT baǵyttar boiynsha Úndistanǵa magistranttar men doktoranttardy jiberýge ýaǵdalasqanyn habarlady.
«Kei baǵyttar bizdiń elimizde jaqsy jolǵa qoiylǵan, al ekinshi bir salalar boiynsha Úndistannyń tájiribesi myqty. Sondyqtan, bul kelisim qos eldiń stýdentteri úshin de óte paidaly», - dedi E. Saǵadiev.
Aita keteiik, Shanhai yntymaqtastyq uiymyna Qazaqstan, Qyrǵyzstan, Qytai, Resei, Tájikstan jáne Ózbekstan elderi múshe. Ótken jyly Astanada ótken ShYU múshe-memleketter basshylarynyń Keńesinde uiymǵa múshe mártebesi Úndistan men Pákistanǵa berilgen bolatyn.
