Biyl qazandaǵy jaǵdai boiynsha shaǵyn jáne orta biznes sany 1 mln 300 myńnan asty. Bul týraly Parlament Senatynyń Tóraǵasy Máýlen Áshimbaev málim etti, dep habarlaidy "Ult aqparat".
«Sońǵy jyldary belsendi shaǵyn jáne orta biznes sýbektileriniń jalpy sany ósip keledi. 2020 jylǵy 1 qazandaǵy jaǵdai boiynsha olardyń sany 1 mln 300 myńnan asty, Bul óz kezeginde ońtaily nátije. Sonymen birge, otandyq ShOB Ekonomikalyq yntymaqtastyq jáne damý uiymy elderindegi osy sektordan ózgesheleý bolyp tur. Bizde ázirge tehnologiialyq startaptar, óndirispen ainalysatyn eksporttaýshylar men shaǵyn jáne orta kásiporyndar jetkiliksiz», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saiasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aitýynsha, elimizdegi kásiporyndardyń negizgi qyzmeti retinde saýda salasy qalyp otyr. Bul baǵytta sýbektilerdiń úshten biri jáne ShOB salasynda jumyspen qamtylǵandardyń úshten biri qyzmet etip jatyr.
«Budan bólek, kásiporyndardyń eleýli úlesi tolyqtai nemese ishinara kóleńkede jumys istep otyr. Ony moiyndaý kerek. Ekonomikada shaǵyn jáne orta biznes úlesin arttyrý úshin bul sektordy kóleńkeden shyǵaryp, onyń sapasyn arttyryp, ártaraptandyrý mańyzdy», - dedi Senat Tóraǵasy.
