Qazaqstanda bankomattar sany 12 myńnan asty. Árbir 10 qurylǵynyń tórteýi klientterge qolma-qol aqsha berýmen qatar qarajatty kartaǵa salýǵa da múmkindik usynady, dep habarlaidy ranking.kz.
2020 jyldyń qańtar-tamyzynda el aýmaǵynda qazaqstandyq jáne sheteldik tólem kartalarymen 10,4 trln teńge aqsha qolma-qol alyndy. Ótken jylmen salystyrǵanda kórsetkish ózgermedi desek te bolady. Degenmen, 0,1 paiyz ósim bar.
Jalpy, Qazaqstan aýmaǵynda tólem kartalaryndaǵy jiyntyq ainalymnan qolma-qol aqsha sheship alý 59,9 paiyzdan 35,8 paiyzǵa deiin qysqaryp, turǵyndar qolma-qol aqshasyz tólem jasaýǵa kóshkenin baiqaýǵa bolady. Nebári osydan 5 jyl buryn ǵana bankomattar men bank bólimshelerinen aqsha sheship alý ainalymǵa túsken qarajattyń 90 paiyzynan asyp jyǵylatyn.
Kartadaǵy qarajatty sheship alý kóleminiń qysqarýy elimizdiń 3 óńirinde baiqalady. Al qalǵan oblystarda 0,9 paiyzdan 27,7 paiyzǵa deiin ósim bar. Bul rette almatylyqtar qolma-qol aqsha ustaýdan bas tarta bastaǵany anyq bilinedi. Degenmen, osy qala turǵyndary esepti kezeńde kartalarynan 2,1 trln teńge sheship alyp, óńirler arasynda kósh bastap tur.
Qolma-qol aqshalardyń basym kólemi bankomattardan alynǵan. Onyń kólemi 8 aida 9,6 trln teńgege jetti. Bul ótken jylmen salystyrǵanda 10,6 paiyzǵa kóp. Elimizde bankomattar sany da artyp, 2020 jyldyń I-jartyjyldyǵynda 12 myńnan asyp tústi. Barlyq bankomattyń úshten biri Almaty (2,3 myń) men Nur-Sultan (1,5 myń) qalalarynda shoǵyrlanǵan. Al Túrkistan men Qaraǵandy oblystarynyń jáne Shymkent qalasynyń árqaisysynda 1 myńnan sál asatyn bankomat bar.
