Foto:elements.envato.com
Májilis depýtaty Nartai Sársenǵaliev tsifrlyq damý ministrliginen sapasyz internet máselesin sheshý úshin arnaiy komissiia qurýdy jáne interneti joq eldi mekenderdiń tizimin ashyq jariialaýdy surady, dep habarlaidy Sputnik Qazaqstan.
Depýtattyń deregine súiensek, Qazaqstanda halyq sany 200 myńnan asatyn 1 432 aýyl keń jolaqty mobildi internetke qosylmaǵan. Bul resmi derek, shynaiy jaǵdaiǵa kelsek, ǵalamtordy atymen kórmegen eldi mekender sany budan áldeneshe ese kóp bolýy bek múmkin, deidi ol.
"Qazaqstanda internet bar" degen aty bolmasa, búkil álemde jyldam sanalatyn jeli bizdiń elge kelgende tabanyna tas bailap alǵandai kórinedi. Basqasyn bylai qoiǵanda bas qalanyń biraz jerinde internet áýpirimdep áreń isteidi. Sapaly internetti basqa túgili bas qalada qoldaný qiynnyń qiyny. Internettiń syn kótermeitin sapasyna qaramastan halyqqa qajet talai qyzmetti elektrondy portaldarǵa salyp tastady jaýapty vedomstvo. Internetsiz ómirdiń azabyn qazir eń aldymen ustazdar men oqýshylar tartyp otyr", - deidi Sársenǵaliev tsifrlyq damý, innovatsiialar jáne aeroǵarysh ónerkásibi ministrine joldaǵan depýtattyq saýalynda.
Biyl 4 aidyń ishinde qazaqstandyqtar sapasyz internetke qatysty 5 myńnan astam aryz-shaǵym túsirgen.
"Osy jerde zańdy saýal týady, sapasyz internetti usynǵan operatorlarǵa qandai jaza kesildi? Qansha aiyppul salyndy? Buǵan deiin bailanys operatorlaryna salynǵan aiyppuldy estip keldik, demek bul máseleniń sheshimi emes ekenin túsinetin kez kelgen joq pa? Jurtqa aiyppul emes, sapaly internet qajet emes pe?", - dep ashyndy májilismen.
Osy oraida depýtat jaýapty ministrlikten Qazaqstan qashan sapaly internetpen 100 paiyz qamtamasyz etiletinin surady.
"Qalalar ǵana emes, alystaǵy aýyldarǵa, shekaralyq aimaqtaǵy eldi mekenderge sapaly ǵalamtor qashan jetkiziledi? Atqarylǵan jumysty túgel joqqa shyǵarýdan aýlaqpyz, búgingi kúnge deiin 6290 aýyldyń 4974-ne keń jolaqty mobildi internet tartylǵan. Biraq bul qalǵan myńnan astam eldi mekendegi halyqtyń quqyǵyn shekteý emes pe?", - deidi Sársenǵaliev.
Osy rette depýtat ministrlikke sapasyz internet pen uialy bailanyssyz otyrǵan aýyldardaǵy problemany sheshý úshin úkimet tarapynan arnaiy komissiia qurýdy, onyń quramyna qoǵam belsendilerin, sala mamandaryn jáne depýtattardy qosýdy surady.
Sondai-aq ol uialy bailanys pen interneti joq aýyl-aimaqtardyń tizimin atyn atap turyp ashyq jariialaý qajet ekenin aitty.
"Internetsiz otyrǵan aýyl-aimaqtardyń turǵyndary ózi turyp jatqan eldi mekenge qashan, qai kezde ǵalamtordyń qosylatynyn naqty bilýi kerek. Sondyqtan ministrlik qoǵam aldynda jaýapkershilik alyp, qai jerge, qashan sapaly internettiń jetetinin ashyq jariialaýy qajet", - dep sanaidy májilismen.
