Qazaqstannyń eńbek zańnamasyna tekserý júrgizý josparlanyp otyr. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Eńbek zańnamasyn jetildirý máselesi QR Úkimeti janyndaǵy áleýmettik seriktestik, eńbek qatynastaryn retteý jónindegi respýblikalyq úshjaqty komissiia otyrystarynda turaqty túrde qaralady. Jalpy eńbek zańnamasyn jetildirý jumystary únemi júrgizedi», - dedi vitse-premer jaýabynda.
Onyń atap ótýinshe, 2020 jyly «Eńbek máseleleri boiynsha Qazaqstan Respýblikasynyń keibir zańnamalyq aktilerine ózgertýlermen tolyqtyrýlar engizý týraly» QR Zańy qabyldanyp, kásibi táýekelderdi baǵalaý jáne basqarýǵa negizdelgen eńbekti qorǵaýdy basqarý júiesin engizý boiynsha birqatar ózgertý men tolyqtyrý engizilgen.
«Nátijesinde eskertý, aldyn alý jáne ótem is-sharalaryn qamtityn jumysshynyń densaýlyǵyn qorǵaýdyń eskertpeli sharalaryn qabyldaýdy qamtamasyz etý úshin kásibi táýekelderdi baǵalaý jáne basqarýdyń úzdiksiz protsesi qamtamasyz etildi. Áleýmettik seriktesterdiń pikirlerin jan-jaqty qaraý jáne esepke alý úshin Eńbek jáne halyqty áleýmettik qorǵaý ministrligi janynan eńbek zańnamasynyń quqyq qoldaný tájiribesine saraptama jasaý jónindegi jumys toby quryldy», - dedi ol.
Eraly Toǵjanovtyń dereginshe, jumys tobynyń quramyna salalyq memlekettik organdardyń, Bas prokýratýranyń, «Atameken» ulttyq kásipkerler palatasynyń, kásipodaqtar men iri kásiporyndardyń ókilderi kirdi. Sonymen qatar top quramyna Májilis depýttary da shaqyrylatyn bolady.
«Atalǵan jumys toby eńbek zańnamasynyń jumysshylardyń múddesine jáne olardyń eńbek quqyqtarynyń qorǵalýyna sáikestigine tekserý júrgizedi», - dedi Úkimet basshysynyń orynbasary.
