Búgin astanada «Altyn júrek» eskertkishiniń ashylý rásimine qatysqan Prezident Qasym-Jomart Toqaev «Qazaqstan Respýblikasynyń eńbek sińirgen dárigeri» ataǵyn engizýdi usyndy, dep habarlaidy "Ult aqparat".
Memleket basshysynyń aitýynsha, meditsina qyzmetkerleriniń qoǵamdaǵy mártebesin arttyrý úshin «Qazaqstan Respýblikasynyń eńbek sińirgen dárigeri» ataǵyn engizilmek. Ataqpen birge materialdyq syiaqy da beriledi. Onyń kólemin Úkimet belgileidi.
Budan bólek, Qasym-Jomart Toqaev densaýlyq saqtaý júiesinde qyzmet etý óskeleń urpaq úshin mártebeli ári tartymdy bolýy tiis ekenin atap ótti.
Sonymen qatar Prezident orta deńgeidegi meditsina qyzmetkerlerine qoldaý kórsetý máselesine toqtaldy. Memleket basshysynyń pikirinshe, olar densaýlyq saqtaý júiesiniń basty resýrsy jáne jumystyń negizgi bóligin atqarady.
«Bizge meiirgerlerdiń jańa býynyn qalyptastyrý qajet. Olar tek oryndaýshylar ǵana emes, kóp salaly emdeý tobynyń jaýapkershilik júktelgen teń quqyqtyq músheleri bolýy tiis. Osy oraida olardyń kásibi daiyndyǵynyń deńgeiin birtindep kóterip, meiirgerlik isiniń mártebesin arttyrý qajet», – dedi Memleket basshysy.
Prezident óz sózinde Elbasynyń bastamasymen iske asyrylǵan «Biz birgemiz» aktsiiasy aiasynda pandemiiaǵa qarsy kúreske zor úles qosqan eriktiler men metsenattardyń qyzmetin atap ótti.
Qasym-Jomart Toqaev barsha meditsina qyzmetkerlerin kásibi merekesimen quttyqtap, «Altyn júrek» eskertkishi ornalasqan saiabaqty «Dárigerler alleiasy» dep ataýdy usyndy.
Memleket basshysy jańadan ashylǵan keshen aq halatty abzal jandarǵa degen halyq alǵysynyń belgisi bolatynyna senim bildirdi.
