Qazaqstanda eńbek naryǵyndaǵy ózgeristerge bailanysty jastardy jumysqa ornalastyrýǵa kómektesetin jappai qaita daiarlaý «fabrikalaryn» ashý josparlanýda, dep habarlaidy QazAqparat.
Qazirgi ýaqytta syrtqy faktorlar eńbek naryǵyna qatty áser etedi. Mysal retinde birneshe faktordy keltirgim keledi. Bizde jumyspen qamtylǵan halyqtyń 15%-ynda tek qana orta bilim bar. Olarǵa jumysqa ornalasý óte qiyn. Túlekterdiń 40%-dan astamy óz mamandyǵy boiynsha jumysqa ornalaspaidy. Mamandyq tańdaý kezinde túlekterdiń 34%-y mamandyqty ózderi tańdamaidy. Keiin oqýdy aiaqtaǵan soń, árine olar jumysqa ornalasa almaidy. Sondyqtan oqýshy mektepten shyqqan kezde ózine unaǵan JOO-ǵa sanaly túrde túsý úshin kásibi baǵdar berý mańyzdy», - dedi QR Eńbek jáne halyqty áleýmettik qorǵaý vitse-ministri Erjan Birjanov Ortalyq kommýnikatsiialar qyzmetinde ótken baspasóz máslihatqa.
Osyǵan bailanysty Eńbek ministrligi kolledjder men jumys istep turǵan kásiporyndar bazasynda jappai qaita daiarlaityn jáne biliktilikti arttyratyn «fabrikalar» ashýdy josparlap otyr. Mundai alǵashqy fabrikalardy jastardyń basym bóligi shoǵyrlanǵan Almaty, Shymkent qalalarynda iske qosý kózdelgen.
«Bul AQSh-tyń jáne basqa da Eýropa men Aziia elderiniń tájiribesi, daǵdarys kezinde olar halyqty tez mamandyqtarǵa úiretti. Iaǵni, bul 2-3 jyldyq oqý emes, 2-3 ailyq kýrstar, olar boiynsha daǵdylardy, sertifikatty jedel alýǵa jáne naryqqa tez shyǵýǵa bolady», - dep túsindirdi E. Birjanov.
