Biylǵy birinshi jartyjyldyqta Qazaqstan azamattary 282,5 mlrd teńgege 30 754 jańa jeńil kólik jáne jeńil kommertsiialyq avtomobil satyp aldy. Bul týraly "Ult aqparat" «QazAvtoÓnerkásipke» silteme jasap habarlaidy.
Belgili bolǵandai, jeńil kóliktiń ortasha quny 8,8 mln teńgeni qurap, ótken jyldyń sáikes kezeńine qaraǵanda 6 paiyzǵa ósti. Qazaqstanda qurastyrylǵan kólikter segmentinde bul kórsetkish ortasha naryqtyq deńgeiden aitarlyqtai tómen bolyp, 6,6 mln teńge shamasynda qalyptasty. Al importtyq kólikterdiń ortasha quny 10,9 mln teńge somasynda tirkeldi.
«Qańtar-maýsym ailarynyń qorytyndysy boiynsha satyp alýshylardyń úshten birine jýyǵy (29,3%) 5 mln teńgeden qymbat emes avtomobilderdi tańdady. 5-7 mln teńgege baǵalanyp, satylǵan kóliktiń úlesi 19 paiyzdy (5 840 avtomobil) qurady», - delingen habarlamada.
Kólik satyp alǵandardyń 13,9 paiyzy (4 271 kólik) 7-10 mln teńge aralyǵyndaǵy avtomashinalarǵa tańdaý jasady.
Sonymen qatar, biznes (10-15 mln teńge) ári premiým sanattaǵy (15 mln teńgeden joǵary) segmentter jańa kólikter naryǵynda sáikesinshe 26,9 paiyzdy (8 275 kólik) jáne 10,9 paiyzdy (3 348 kólik) qamtydy.
Eń qoljetimdi jeńil modelder reitinginde usynystardyń jartysy Qazaqstandaǵy avtoóndirýshilerge tiesili. Máselen, baǵasy tómen kólikter arasynda 3,1 mln teńgeden bastalatyn Lada Granta kósh bastap tur.
