QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev elektrondy tsifrlyq qoltańbanyń (ETsQ) balamasy paida bolatynyn aitty, dep habarlaidy QazAqparat.
«Qazirgi qoldanystaǵy elektrondy tsifrlyq qoltańbadan jańa «bultty» ETsQ-nyń basty aiyrmashylyǵy sol, ony paidalaný úshin kompiýterge qosymsha baǵdarlama (NCALayer) ornatpaisyz. Jazdyń sońyna deiin ony qanatqaqty rejimde iske qosamyz dep oilaimyn», - dedi ministr onlain rejimde halyqqa esep berý barysynda.
«Azamattar únemi ETsQ-ǵa qatysty kóp suraq qoiatyn. Birinshiden, ETsQ-ny alý úshin HQKO-ǵa barý keibireýlerge qiyndyq týdyrsa, endi bireýlerine ETsQ-ny paidalaný úshin kompiýterge qosymsha baǵdarlama ornatý qajettigi unamady. Osydan birneshe ai buryn biz ETsQ-ny qashyqtan alý protsesin iske qostyq. Al, qazir NCALayer ornatýdy qajet etpeitin balamaly elektrondyq tsifrlyq qoltańbany ázirleýmen ainalysýdamyz», - dedi Jumaǵaliev.
Taratylǵan málimetke qaraǵanda, ETsQ-nyń jańa túri kompiýterde nemese basqa da tasyǵyshta saqtalmaidy. Qyzmetti alý kezinde júie azamattyń serverde saqtalǵan tsifrlyq qoltańbasyn avtomatty túrde tabady. Qazirgi ýaqytta ETsQ-nyń jańa túri ázirleý satysynda. Ony qoldanysqa biyl engizý josparda bar.
