Qazaqstanda bir rettik elektrondy temekimen kúres máselesi qolǵa alyndy. Bul týraly QR Ulttyq ekonomika ministri Áset Erǵaliev málim etti, dep habarlaidy QazAqparat.
«Bir rettik elektrondy temekimen kúres máselesin Densaýlyq saqtaý ministrligimen birge qarastyryp jatyrmyz. Ázirge qashan jáne qalai bolatyny týraly aita almaimyn. Bul jerde mamandardan bólek, kásipkerlerdiń de pikirin eskerý qajet. Barlyq jaqtyń ustanymyn bilý úshin ýaqyt kerek. Sonymen qatar bul máselege qatysty arnaiy jumys toby jáne depýtattarmen birlesken jumys júrip jatyr», - dedi Áset Erǵaliev OKQ-de ótken baspasóz máslihatynda.
Aita ketsek, osydan 2 kún ǵana buryn Májilistiń jalpy otyrysynda depýtat Mádi Ahmetov bir rettik elektrondy temekiniń jastar arasynda keńinen taralýyna alańdaýshylyq tanytqan edi.
«Dúken bylai tursyn, áleýmettik jelini ashsańyz, nikotindi taýardy táýlik boiy úiińizge tegin jetkizip beretin pablikterde, anonimdi telegram kanaldarda júzdegen jarnama bar. Tapsyrys berýshiniń jasyn surap, bas qatyryp jatqan eshkim joq. Osynyń saldarynan oqý jylynyń basynan oqýshylar arasynda tútini býdaqtaǵan ziiandy shylymǵa suranys eselep artqan. Tipti, keibir mektepterde joǵary synyp oqýshylary bastaýysh synyptarǵa bir rettik temekiniń qunyna aqsha qosyp satyp, áýestendirip júr. Elimizdiń ulttyq qoǵamdyq densaýlyq saqtaý ortalyǵynyń sońǵy 2019 jylǵy zertteýleriniń málimetine súiensek, 11 jastan 15 jasqa deiingi elektrondy temeki shegetin jasóspirimderdiń sany 3 esege, al qyzdar arasynda 2 esege ósken. Kósh basynda 3,9 paiyz kórsetkishpen almatylyq jasóspirimder tur. Atalǵan zertteý sońǵy eki jyl júrgizilmegendikten, qazirgi jaǵdai múlde belgisiz», - dedi M. Ahmetov.
