QR Densaýlyq saqtaý ministrligi meditsinalyq qujattamany qaǵazsyz tsifrlyq júiege kóshirý aiasynda densaýlyq saqtaý uiymdarynda patsient týraly aqparatty jinaý, saqtaý jáne almasý úshin elektrondy pasportty engizdi. Bul týraly Densaýlyq saqtaý vitse-ministri Oljas Ábishev aitty, dep habarlaidy QazAqparat.
«Elektrondy densaýlyq pasportynyń negizgi maqsaty - meditsina salasyndaǵy búkil málimetti jinaqtaý, talqylaý jáne ary qarai qandai sheshim qabyldaý kerektigine kómektesý», - deidi vitse-ministr.
Onyń aitýynsha, 2018-2019 jyldar aralyǵynda meditsinalyq uiymdarda 600-den astam qaǵaz túrindegi eseptik-tirkeý júrgizilgen.
«Elimizdegi azamattar emhana nemese meditsinalyq uiymdarǵa barǵan kezde bul málimetter elektrondy densaýlyq pasportyna jazylady. Osylaisha siz Elektrondy úkimet portaly nemese mobildi qosymsha arqyly qai emhanaǵa tirkelgenińizdi, sizdi qai dáriger emdeitinin, tegin dári-dármekpen qamtamasyz etý baǵdarlamasy aiasynda qandai dárini tegin alatynyńyzdy, sondai-aq memleket tarapynan kórsetiletin basqa da meditsinalyq qyzmet túri týraly bile alasyz», - deidi Oljas Ábishev.
Vitse-ministr tsifrlandyrýdyń arqasynda meditsina salasyndaǵy zańbuzýshylyqtar anyqtalǵanyn aitty.
«Ótken jyly biz 100 myń adamǵa tegin dári-dármek berilgeni tiraly SMS-habarlama jiberip, 8 myń adamnan tegin dári-dármek almaǵany týraly jaýap aldyq. Osyndai alaiaqtyq áreketter tsifrlandyrý arqyly anyqtaldy», - deidi ol.
