Densaýlyq saqtaý ministri Eljan Birtanov elektrondy densaýlyq tólqujatynyń iske qosylǵanyn málimdedi, dep habarlaidy Sputnik Qazaqstan.
"Osy aptada biz basqa memlekettik organdarmen birge elektrondy densaýlyq pasportyn resmi túrde iske qostyq. Ázirshe pilottyq rejimde kez kelgen adam egov.kz saityna kirip, óziniń tólqujatyn kóre alady. Onda osy ýaqytqa deiin barǵan meditsinalyq mekemeler, jazylǵan retseptiler jáne taǵy basqa málimetter kórsetilgen", - dedi Birtanov astanadaǵy baspasóz máslihatynda.
Ministrdiń aitýynsha, buǵan deiin barlyq málimet árbir mekemeniń jeke bazasynda saqtalyp kelgen. Endi sonyń bárin tólqujatqa engizýdiń arqasynda em-dom alý dinamikasyn baqylaýǵa bolady.
"Ázirshe pasporttar saitta ornalasqan. Jaqyn arada osy qyzmettiń mobildi nusqasy ázirlenedi. Sóitip, árbir adam egov.kz saitynyń mobildi nusqasyna kirip, barlyq jazbalardy kóre alady. Al kelesi jyldan bastap elektrondy densaýlyq tólqujattary avtomatty túrde jańartylyp otyrady. Demek, adam emhanaǵa barsa, ol týraly jazba birden tólqujatqa túsedi", - dep atap ótti Birtanov.
