2019 jyly Qazaqstanda 1 492 114 avtokólik tirkeýge qoiyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaidy "Ult aqparat".
«Esepti kezeńde ákimshilik politsiia organdary 1 492 114 avtokólikti tirkedi. Atalǵan kórsetkish ótken jyldyń sáikes kezeńinen 12,2 paiyzǵa artyq. Onyń ishinde 1 385 356-sy ekinshi ret tirkelgender úlesinde, iaǵni bir adamnan ekinshi adamnyń atyna aýystyrylǵan kólikter sanatyna jatqyzyldy. Ósim 2018 jylmen salystyrǵanda 11,2 paiyzǵa jetti. Al alǵash ret tirkelgen kólik quraldarynyń sany 106 758-di qurady. Ol ótken jylǵyǵa qaraǵanda, 27 paiyzǵa joǵary», - dep atap kórsetilgen habarlamada.
Qazaqstanda elektromobilge degen suranys 1,7 esege tómendegen. 2019 jylǵy 12 aida elimiz aýmaǵynda 33 elektromobil tirkelgen eken. Al bir jyl buryn 56 elektromobil satylǵan bolatyn.
«QazAvtoÓnerkásiptiń» habarlaýynsha, esepti kezeńde qaita tirkelgen kólikterdiń úshten ekisinen astamynyń (69,1 paiyzy) paidalaný merzimi 10 jyldan asqan kólikterdi qamtyǵan.
Atap aitqanda, 20 jyldan asqandardyń úlesi 575 974 kólik (41,6 paiyz) bolsa, 11-den 20 jylǵa deiingiler 27,5 paiyzdy (381 085 kólik) qurady. Al 4-ten 7 jylǵa deiin – 285 883 (20,6 paiyz), 8-den 10 jylǵa deiin – 82 922 (6 paiyz), 1-den 3 jylǵa deiingi kólikter sany 48 856-ǵa (3,5 paiyz) jetti. Sonymen qatar, paidalaný merzimi 1 jylǵa jetpegen kólikterdiń úlesi 0,8 paiyz (10 636 kólik) boldy.
