Qazaqstanda elektromobilderdi qýattaý úshin avtojoldardyń boiynda stantsiialardy ornatýdyń normativi ázirlendi.
Bul týraly Májiliste tiisti zań jobasyn tanystyrý kezinde Indýstriia jáne infraqurylymdyq damý vitse-ministri Amaniiaz Erjanov aitty, dep habarlaidy QazAqparat.
«Osynda tiisti normativtik-quqyqtyq aktiler qarastyrylǵan. Bul turǵyda avtomobil joldaryn salý kezinde elektromobilderdi qýattaý boiynsha stantsiialardy ornatý eskerilgen. Sondyqtan osy normalar bul zań jobasynda qarastyrylyp otyr», - dedi A. Erjanov depýtattar suraǵyna jaýap bere otyryp.
Sonymen qatar ol alǵashqy stantsiialar Nur-Sultan men Almatyda ornatylyp jatqanyn aitty. Elorda men Býrabai aralyǵyndaǵy avtojolda tiisti qurylǵylar qoiylady.
Budan buryn habarlanǵandai, búgin QR Parlamenti Májilisinde «Qazaqstan Respýblikasynyń keibir zańnamalyq aktilerine energiia únemdeý jáne energiia tiimdiligin arttyrý máseleleri boiynsha ózgerister men tolyqtyrýlar engizý týraly» zań jobasy tanystyryldy.
Qujat aiasynda iri kásiporyndarda energiia únemdeý máseleleri boiynsha jaýapty adamdardy engizý usynylady, olar energiia menedjerleriniń rólin atqarmaq.
