2021 jyldyń 4 maýsymynda Ekologiia, geologiia jáne tabiǵi resýrstar ministriniń elektr kólikterine, elektr avtobýstaryna jáne elektr júk kólikterine qatysty kádege jaratý tólemin esepteý úshin nóldik koeffitsientti belgileý týraly buiryǵy kúshine enedi, dep habarlaidy "Ult aqparat".
«Endi Qazaqstan Respýblikasy aýmaǵyna elektr kólikterin, elektr avtobýstardy nemese elektr júk mashinalaryn ákelý kezinde kólik quraly úshin kádege jaratý tólemi talap etilmeidi. Bul bastamany ÓKM Operatory 2020 jyly usynǵan bolatyn. Osy másele jan-jaqty pysyqtalyp, talqydan ótken soń, QR ekologiia, geologiia jáne tabiǵi resýrstar ministri Maǵzum Myrzaǵaliev resmi qujatqa 2021 jyldyń 13 mamyrda qol qoidy», - dep habarlady ÓKM (Óndirýshilerdiń keńeitilgen mindettemeleri) operatory.
Buǵan deiin M1 sanatyndaǵy elektr qozǵaltqyshy bar avtomobil úshin kádege jaratý tólemi 437 550 teńge, M2, M3 sanaty úshin 1 166 800 teńge bolǵan edi. Júk kólik quraldary úshin kádege jaratý tóleminiń mólsheri 1 020 950 teńgeden bastaldy.
«Qazaqstan avtomobil biznesi qaýymdastyǵynyń aqparaty boiynsha, búginde elimizde 422 elektr kóligi tirkelgen. Ekologiia ministrligi bul sharalar Qazaqstanda elektromobil óndirisin yntalandyrýǵa, ekologiialyq taza kólik quraldaryn satyp alýǵa suranysty arttyrady dep esepteidi. Qazirgi ýaqytta ÓKM Operatory elektr qýattaý stansalarynyń infraqurylymyn damytý jobasy aiasynda Nur-Sultan jáne Almaty qalalarynda jáne Nur-Sultan-Býrabai baǵytynda 103 jyldam elektr qýattaý stansalaryn ornatýdy aiaqtady», - deidi ÓKM operatory.
