Biylǵy jyldyń úsh toqsanynda Qazaqstanda elektr energiiasyn óndirý 83,6 mlrd kVt/saǵ-ty qurady. Bul bir jyl burynǵyǵa qaraǵanda 7,7% kóp, dep habarlaidy QazAqparat ranking.kz-ke silteme jasap.
Elektr energiiasyn tutyný - 7%, iaǵni 2,9 mlrd kVt/saǵ-qa (Ońtústik aimaq boiynsha 12% jýyqqa) deiin artty.
Qazaqstannyń úsh óńirinde - Atyraý, Pavlodar jáne Soltústik Qazaqstan oblystarynda elektr energiiasy artyǵymen qalyp jatsa, qalǵan óńirlerde energiia tapshylyǵy baiqalady. Olardyń kóbinde tutyný óndiristen birneshe ese asyp túsedi.
Jaryqty tutyný kóleminiń ulǵaiýy elimizdiń barlyq óńirinde tirkelgen, eń kóbi — Qyzylorda (jylyna 16,5%), Batys Qazaqstan (14,3%), Aqmola (14,2%), Túrkistan (12,7%) jáne Almaty (11,4%) oblystarynda.
Aita keteiik, elektr energiiasyn tutynýdyń mundai ósimi ótken jylǵy kórsetkishterden kúrt asyp túsedi. 2020 jyldyń uqsas kezeńinde elektr energiiasyn tutyný kóleminiń ósimi tek 1,5%, 2019 jyly — 1,6% quraǵan bolatyn.
Tek biylǵy jyldyń qyrkúiek aiynda sektorda tutyný kólemi 8,7 mlrd kVt/saǵ-ty qurady, bul 2020 jyldyń qyrkúiegine qaraǵanda 7,5% kóp. Eń joǵary jyldyq ósim Batys Qazaqstan (28%), Túrkistan (15%) jáne Aqmola (13%) oblystarynda baiqaldy.
