Qazaqstanda eldi mekenderge taqaý qoimalardan 20 myń tonnadan astam oq-dári shyǵaryldy. Bul týraly QR Qorǵanys ministriniń orynbasary, general-maior Baqyt Qurmanbaev aitty, dep habarlaidy QazAqparat.
«Memleket basshysynyń tapsyrmasyn oryndaý maqsatynda Arystan shamamen 20 myń tonnaǵa jýyq oq-dári shyǵaryldy. Al ózge eldi mekenderde ornalasqan qoimalardan 750 tonnadan astam iri kalibrli oq-dáriler shyǵarylǵan bolatyn. Bul halyqtyń qaýipsizdigin qamtamasyz etý maqsatynda jasaldy», - dedi Qorǵanys ministriniń orynbasary.
Onyń atap ótýinshe, Arysta tótenshe oqiǵa oryn alǵannan keiin Qorǵanys ministrliginiń buiryǵymen elimizdiń barlyq óńirlerindegi qoimalarǵa 1 ai boiy tekserý júrgizildi. Mundai tekserýler turaqty túrde ótkizilip keledi. Tekserý komissiiasynyń quramyna mol tájiribesi bar bedeldi áskeri mamandar kiredi.
Atalǵan komissiia tótenshe jaǵdailar týyndaý táýekeline jan-jaqty baǵa berip, atys qarý-jaraqtary men oq-dáriler saqtalatyn barlyq nysandardyń qaýpisizdigin kúsheitý boiynsha sharalar usyndy.
