Tuńǵysh Prezident Qory daryndy balalar men jastardy keshendi qoldaýǵa arnalǵan jobalardy iske asyra bastady, dep habarlaidy QazAqparat Tuńǵysh Prezident Qoryna silteme jasap.
Qazaqstan Respýblikasy Tuńǵysh Prezidenti – Elbasynyń qory N.Á. Nazarbaevtyń tapsyrmasyna sáikes jas talanttar men kóshbasshylardy qoldaý maqsatynda «El úmiti» jańa bastamasy boiynsha jumys júrgize bastady.
Tuńǵysh Prezident Qorynyń atqarýshy direktory Áset Isekeshev: «El úmiti» bastamasynyń missiiasy – bizdiń daryndy balalarymyz ben jastarymyzdy, sonyń ishinde shetelde turatyn jastardy izdep-taýyp, qoldaýǵa septesý. Biz bul bastamanyń aiasynda elimizdiń jastaryn barynsha qamtýǵa tyrysamyz, olardyń ereksheligin, daryndylyǵyn, ǵylymi jáne kóshbasshylyq áleýetin eskere otyryp, ár balaǵa ózin-ózi damytýǵa teń múmkindik beremiz», - dep atap ótti.
«El úmiti» bastamasy aiasynda Tuńǵysh Prezident Qory Úkimetpen, oblys ákimdikterimen, qoǵamdyq birlestikterimen, bilim berý jeke uiymdarymen, biznes-qaýymdastyǵymen jáne qyzyǵýshylyq bildirgen taraptarmen birlesip jumys istemek.
Seriktestermen birge kelesi jobalar júzege asyrylmaq: daryndardy anyqtaý jáne qoldaý ortalyqtaryn qurý; jastar úshin kóshbasshylyq jáne tulǵalyq ósý baǵdarlamasyn jasaý jáne júzege asyrý; Olimpiada jeńimpazdary men olardyń pedagogtaryn qoldaý baǵdarlamasy; talanttar men kóshbasshylardy qosatyn birikken qaýymdastyq qurý; «IQanat» Qorymen birge aýyl balalaryna arnalǵan «Myń bala» ziiatkerlik damý baǵdarlamasyn júzege asyrýǵa kómek kórsetý.
Jas talanttar men ártúrli saladaǵy kóshbasshylardyń (patriotizm, sporttyq jetistikter, eriktilik, akademiialyq jetistikter) jan-jaqty damýy úshin jumysty kúsheitý maqsatynda jeke ósý baǵdarlamasyna belsendi qatysqandar úshin marapattaý baǵdarlamasy jasalady.
Osy mindetterdiń iske asyrylýyn úilestirý úshin Qordyń janynda «Elbasy akademiiasy» qurylady. Ol «El úmiti» bastamasyn iske asyrýdy basqarý jónindegi operator retinde áreket etedi.
«El úmiti» bastamasynyń aiasynda ádistemeler, taǵylymdamalar baǵdarlamalary men granttar ázirlenedi.
Bul árbir óńirde jyl saiyn aýyldar men shaǵyn qalalardan keminde 3 myń daryndy balany anyqtap, keiingi bilim berýde qoldaý kórsetetin talanttardy anyqtaý jáne qoldaý ortalyqtaryn (17 ortalyq) qurýǵa múmkindik beredi.
Birinshi kezeńde, eki jyl aralyǵynda ǵylym, ekonomika, mádeniet, sport jáne qoǵamnyń basqa da baǵyttarynyń memlekettik basqarý salalarynda 500-den kem emes kóshbasshy pýlyn qalyptastyrý josparda bar.
Daryndy jastar, kóshbasshylar men oqytýshylarynyń biryńǵai qoǵamdastyǵy qurylady.
Bastamany ýaqytyly jáne sapaly iske asyrý úshin Tuńǵysh Prezident Qory múddeli memlekettik organdarmen birlesip «Jol kartasynyń» jobasyn daiyndady.
Sonymen qatar Tuńǵysh Prezident Qory bilim berý jáne jeke tulǵany damytý boiynsha jeke Qorlardyń bastamalaryna qoldaý kórsetedi.
2019 jylǵy 1 tamyz kúni Qazaqstan Respýblikasynyń Tuńǵysh Prezidenti – Elbasy Nursultan Nazarbaev Qazaqstan Respýblikasynyń Tuńǵysh Prezidenti – Elbasy Qorynyń atqarýshy direktory Áset Isekeshevpen kezdesý barysynda «El úmiti» jáne «Qamqorlyq» bastamalary boiynsha arnaiy tapsyrmalar berdi.
«Qor birqatar is-sharalardy júzege asyrý úshin tiisti jumys júrgizip keledi. Biz talantty jastardy jáne damýynda ereksheligi bar balalardy qoldaýǵa baǵyttalǵan «El Úmiti» jáne «Qamqorlyq» atty jańa eki jobany iske asyrýdy bastaimyz. Talantty jastarymyz el ishinde jáne shetelde bilim alýy úshin olarǵa kómektesýimiz kerek. Bul óte paidaly ári qajetti jumys. Jalpy, Qordyń osy baǵyttaǵy jumysyn jandandyrý kerek», – dedi Qazaqstannyń Tuńǵysh Prezidenti.
