Qazaqstanda ekstremizmge qatysy bolýy múmkin dep kúdikke ilingender arnaiy esepke alynatyn bolady. Bul týraly QR Din isteri jáne azamattyq qoǵam ministrligi Din ister komitetiniń tóraǵasy Erkin Ońǵarbaev aitty, dep habarlaidy QazAqparat.
Qazaqstannyń dini birlestik ókilderiniń «Qazaqstannyń egemen memleket retinde qalyptasýy men damý strategiiasynyń qabyldanǵanyna 25 jyl» taqyrybyndaǵy otyrysy aiasynda tilshilerge suhbat bergen ol dini birlestikter qyzmeti týraly zańǵa engiziletin ózgerister men tolyqtyrýlar jaiynda aityp berdi.
Onyń sózine qaraǵanda, atalǵan ózgeristerge sáikes dini radikalizmmen kúres boiynsha birqatar jańa sharalar júzege asyrylatyn bolady.
«Destrýktivti dini aǵymdarmen kúresýge múmkindik beretin birqatar jańa normalar qarastyrýdamyz. Onyń ishinde ishki ister organdarynda ekstremizm men terrorizm kórinisteri úshin jaǵdai jasaýy múmkin tulǵalardy aldyn ala eskertý sharasyn qoldaný múmkindigi beriledi. Eger adamǵa atalǵan shara qabyldanatyn bolsa, onda ol daktiloskopiialyq kriminaldyq esepke alynady. Iaǵni, bul ekstremizm salasynda qylmys jasaýy múmkin adamdarmen naqty jumys isteýge múmkindik beredi. Mundai norma álemniń kóptegen elderinde bar jáne ol óziniń tiimdiligin dáleldegen», - dedi ol.
Onyń sózine qaraǵanda, búginde ekstremizm kúdigine ilingen adamdarǵa qatysty ideologiialyq, psihologiialyq jáne áleýmettik turǵyda deradikalizatsiialaý jumystary júrgizilýde.
«Olar bilýi úshin quqyq qorǵaý organdary erekshe baqylaýǵa alǵandyǵy eskertiledi. Olardy ashyq túrde esepke alady», - dedi Erkin Ońǵarbaev.
