Bul týraly QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda bilim jáne ǵylym ministri Erlan Saǵadiev pen energetikanyń birinshi vitse-ministri Mahambet Dosmuhambetov baiandady, dep habarlaidy "Ult aqparat" primeminister.kz portalyna silteme jasap.
Erlan Saǵadiev QR BǴM janynan «Ekspo-2017» kórmesiniń qorytyndysy boiynsha jańa «jasyl» tehnologiialardy engizý boiynsha jumys toby qurylǵanyn baiandady.
Saraptaý jumys toby halyqaralyq pavilondardaǵy jańa tehnologiialarǵa monitoring júrgizdi. Barlyq tehnologiialar munai jáne gaz, kómir ónerkásibi, atom ónerkásibi, elektr energetikasy, energiiany únemdeý, qaldyqtardy basqarý, jańǵyrtylatyn energetika, aýa sapasyn baqylaý jáne t.b. siiaqty baǵyttar boiynsha irikteldi.
Qazirdiń ózinde qazaqstandyq jáne sheteldik ýniversitettermen yntymaqtastyq ornatý týraly toǵyz memorandýmǵa qol qoiyldy. Atap aitqanda, Koreia, Latviia, Vengriia, Frantsiia, Polsha, QHR, Ulybritaniia, Ispaniia jáne basqa elderdiń joǵary oqý oryndary ózara yntymaqtastyq ornatýǵa niet bildirdi.
Óz kezeginde, energetikanyń birinshi vitse-ministri Mahambet Dosmuhambetovtyń aitýynsha, energetika ministrligi sondai-aq «Ekspo-2017» kórmesinde usynylǵan jańa tehnologiialardy Qazaqstanda qoldaný múmkindigi týraly usynystardy ázirleý boiynsha saraptaý jumys tobyn qurdy.
«12 qyrkúiekte kompaniialar men uiymdardyń ókilderimen keńes ótti, onda iriktelgen tehnologiialardy engizý tetikteri talqylandy. Tańdalǵan tehnologiialardy engizý úderisi uzaq jáne QR EM ázirlegen jol kartasyna sáikes oryndalady», — dep baiandady M. Dosmuhambetov.
Baqytjan Saǵyntaev óziniń orynbasary Erbolat Dosaevqa atalǵan másele boiynsha QR BǴM men QR EM pysyqtaýlaryn qorytyndylaýdy jáne jańa tehnologiialardy engizý boiynsha biryńǵai Jol kartasyn jasaý múmkindigin qarastyrýdy tapsyrdy.
