Biylǵy 1 mamyrdaǵy jaǵdai boiynsha Qazaqstanda Ekinshi dúniejúzilik soǵysta bolǵan 665 ardager bar. Bul týraly QR Eńbek jáne halyqty áleýmettik qorǵaý vitse-ministri Erlan Áýkenov málim etti, dep habarlaidy QazAqparat.
«Biylǵy 1 mamyrdaǵy jaǵdai boiynsha Qazaqstanda Ekinshi dúniejúzilik soǵystyń 665 ardageri, sondai-aq basqa sanattaǵy 113 myń 555 azamat (Qorshaýdaǵy Leningrad turǵyndary – 74 adam; kontslagerlerdiń burynǵy kámeletke tolmaǵan tutqyndary – 221 adam; UOS qaitys bolǵan múgedekterdiń áielderi (kúieýleri) – 2 296 adam; UOS kezinde qaza tapqandardyń jesirleri – 10 adam; tyl eńbekkerleri – 89 385 adam; UOS qatysýshylary men múgedekterine teńestirilgender– 21 569 adam) turyp jatyr», - dedi vitse-ministr Ortalyq kommýnikatsiialar qyzmetinde.
Osy oraida E. Áýkenov Qazaqstan Táýelsizdiginiń 30 jyldyǵynda Eńbek jáne halyqty áleýmettik qorǵaý ministrliginiń atynan barsha Qazaqstan halqyn Jeńis kúnimen quttyqtady.
«Árbir adamnyń boryshy – óz eliniń ótkenin bilý jáne qurmetteý, barlyq urpaqtyń jarqyn bolashaǵy jolynda Jeńiske jetý úshin maidanda soǵysqan jáne tylda eńbek etken ardagerlerimizdiń erlikterin umytpaý. Soǵys kezinde maidanǵa 1 mln 200 myńnan astam qazaqstandyq shaqyryldy, 20-dan astam atqyshtar diviziiasy men basqa da quramdar quryldy», – dedi Erlan Áýkenov.
«Jaýyngerlik eńbegi úshin júzdegen myń qazaqstandyq medaldarmen jáne ordendermen marapattaldy, 500-ge jýyq adam Keńes Odaǵynyń Batyry atandy. Tórt qazaqstandyq eki márte Batyr atandy, 110 qazaqstandyq úshinshi dárejeli Dańq ordenimen marapattaldy. Qolyna qarý alǵan árbir ekinshi qazaqstandyq Jeńiske jetý jolynda qasyq qany qalǵansha kúresip, ómirin qidy – urystarda qaza tapty, jaralar men aýrýlardan kóz jumdy, habar-osharsyz ketti. 630 myń adam tutqynnan oralmady», - dedi vitse-ministr.
