Qazaqstanda 2 emdelýshi koronavirýstan jazyldy. Bul týraly «Habar 24» telearnasynyń tikelei efirinde QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat".
«Brifingti jaqsy jańalyqtan bastaǵymyz kelip otyr. Eki emdelýshi koronavirýstan aiyqty. Qazir olar sońǵy tekserý saraptamalaryn tapsyrýda. Buiyrtsa aýrýhanadan erteń shyǵady. Bul - bizdiń koronavirýspen kúrestegi jeńisimiz. Basty dúnie osy dep aitýǵa bolady. Eń aldymen bul - dárigerdiń jankeshti eńbeginiń jemisi. Sondyqtan Úkimettiń jáne barsha qazaqstandyqtyń atynan meditsina qyzmetkerleri men Densaýlyq saqtaý ministrliginiń qyzmetkerlerine alǵys aitýǵa ruqsat etińizder. Kez kelgen maman úshin eń bastysy - óz eńbeginiń nátijesin kórý. Sol nátije úmit pen qýat beredi», - dedi Dáýren Abaev.
Buǵan deiingi derek boiynsha Qazaqstanda 80 adam koronavirýs juqtyrǵan edi.
- Almatyda - 31 adam,
- Nur-Sultanda - 41 adam,
- Qaraǵandyda - eki adam,
- Shymkentte - eki adam,
- Almaty oblysynda - bir adam,
- Aqtóbe oblysynda - bir adam,
- Jambyl oblysynda - bir adam,
- Soltústik Qazaqstan oblysynda - bir adam.
Elimizde koronavirýstan qaza bolǵandar joq. Úkimettiń dereginshe, virýs juqtyrǵandardyń basym bóliginde simptom joq ia sál qyzýy kóterilgen.
Qazaqstanda koronavirýsqa bailanysty 15 sáýirge deiin tótenshe jaǵdai. 19 naýryzdan bastap Almaty men Nur-Sultan qalalary karantinge kóshti.
