Biyl aýyl sharýashylyǵy daqyldarynyń jalpy egis alańy 23 mln gektardy qurady. Bul kólem 2020 jylmen salystyrǵanda 322 myń gektarǵa artyq, dep habarlaidy "Ult aqparat".
«Dándi jáne dándi-burshaqty daqyldar - 16,1 mln gektar (onyń ishinde bidai – 12,9 mln ga), maily daqyldar-3,1 mln gektar, kókónis jáne kartop – 473,8 myń gektar, maqta - 109,7 myń gektar, qant qyzylshasy –21,7 myń gektar, jem-shóp daqyldary 3,2 mln gektar alqapta ornalastyryldy. Biyl egin jinaý naýqany ýaqtyly bastaldy jáne búginde el boiynsha barlyǵy 7,9 mln gektar dándi jáne dándi-burshaqty daqyldar nemese jalpy jinaý alańynyń 49,4 paiyzy jinaldy», - delingen QR Aýyl sharýashylyǵy ministrligi málimetinde.
Aǵymdaǵy ortasha ónimdilik gektaryna 8 tsentner qurap, 6,3 mln tonna astyq bastyryldy. Egin jinaý jumystary bastalatyn ýaqytqa aýyl sharýashylyǵy taýaryn óndirýshiler barlyq qajetti tehnikany daiyndaǵan.
Jalpy, egin jinaý jumystaryn júrgizý úshin respýblikada 141,7 myń traktor, 73,5 myń traktor tirkemesi, 36,9 myń astyq jinaityn kombain, 12,8 myń destelegish bar.
Respýblikada astyqty saqtaýdyń jalpy syiymdylyǵy 28,8 mln tonna, onyń ishinde astyq qabyldaý kásiporyndarynda 12 mln tonna, aýyl sharýashylyǵy taýaryn óndirýshilerde 16,8 mln tonnany quraidy. Kórsetilgen saqtaý syiymdylyǵy ótken jyldan qalǵan astyq kólemderin eskere otyryp, jańa egindi saqtaý úshin jetkilikti.
