Qazaqstannyń qorǵanys ministrligi "Qazaqstan Respýblikasynyń áýe keńistigin buzǵan áýe kemelerine qarý jáne jaýyngerlik tehnika qoldaný erejelerin bekitý týraly" úkimet qaýlysyna engiziletin ózgeristerdi ázirledi.
Munda ózgerister engizýge 2018 jyldyń 22 aqpanyndaǵy №73 úkimet qaýlysynda memlekettik qorǵaýǵa jatatyn nysandardyń shekarasyn buzǵan áýedegi nysanalardyń (ushqyshsyz ushý apparattary) kózin joiýǵa buiryq berýge kim quqyly ekeni naqty kórsetilmeýi sebep boldy. Bul máseleni naqtylaý úshin tórtinshi tarmaqtyń tórtinshi bólimi jańa redatsiiada ázirlendi.
"Memlekettik qorǵaýǵa jatatyn nysandar aýmaǵynda jáne tyiym salynǵan belgilermen nemese qorshaýlarmen belgilengen shekaralardaǵy qorǵalatyn nysandardyń, áskeri bólimderdiń aýmaǵynda, adamdardyń ómiri men qaýipsizdigine qaýip tóndiretin, sondai-aq qarý-jaraq pen áskeri tehnikany qorǵaý kezinde jáne kelisilmegen ushýlardy júzege asyratyn ekipajy men jolaýshylary joq ushqyshsyz ushý apparattary nemese qashyqtyqtan basqarylatyn jáne basqarylmaityn basqa da ushý apparattarynyń kózin joiý úshin qarý-jaraq jáne soǵys tehnikasyn paidalaný týraly sheshimdi Qarýly kúshter, ulttyq qaýipsizdik jáne ishki ister organdary salasyndaǵy birinshi basshylary belgilegen ýákiletti laýazymdy tulǵalar qabyldaidy", - dep jazylǵan qujatta.
Osylaisha bul túzetý qarý-jaraq pen soǵys tehnikasyn qoldaný týraly sheshim qabyldaityn laýazymdy tulǵany anyqtaidy.
Ózgertýlerdi talqylaý 18 mamyrǵa deiin jalǵasady. Al ol resmi túrde jariialanǵan alǵashqy kúnnen keiin on kún ótken soń zańdy kúshine enedi.
