2021 jylǵy 3-toqsanda dizel otyny men kerosindi taýar birjalary arqyly saýdalaýdy bastaý josparlanǵan. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«Biyl 17 mln tonna kóleminde munai óńdep, 12,4 mln tonna munai ónimderin óndirýdi josparlap otyrmyz. Otandyq munai óńdeýdi qoldaý maqsatynda biylǵy jyly ashyq tústi munai ónimderine, iaǵni, benzin, dizel jáne áýe otynyna eksporttyq kedendik baj mólsherlemesi 3 ese tómendetildi. Qazirgi ýaqytta benzin men dizel otynyn eksporttaý kezinde aktsiz tóleýden bosatýǵa qatysty sharalar qabyldanýda», - dedi óńdeý ónerkásibin damytý jaiynda baiandaǵan ministr.
Osy rette ol Prezident Joldaýynyń aiasynda munai ónimderiniń salasynda da birjalyq saýdany retke keltirý jáne jetildirý boiynsha tapsyrma berilgenin eske saldy.
«Biylǵy naýryz aiynyń sońyna deiin benzin men bitýmdy taýar birjalary arqyly saýdalaýdy josparlap otyrmyz. Bul rette ótkizý kólemi «Munai ónimderiniń jekelegen túrlerin óndirýdi jáne olardyń ainalymyn memlekettik retteý týraly» Qazaqstan Respýblikasy Zańynyń aiasynda ministrlik bekitetin ai saiynǵy jetkizý josparlaryna sáikes anyqtalatyn bolady. 2021 jylǵy 3-toqsanda dizel otyny men kerosindi taýar birjalary arqyly saýdalaýdy bastaý josparlanýda», - dedi Nurlan Noǵaev.
