Ótken jyldyń jeltoqsanynda «Aq jol» partiiasy atynan bir top májilismen «Dárigerler mártebesi týraly» zań qabyldaý kerektigin kótergen bolatyn. Depýtattardyń bul saýalyna Asqar Mamin jaýap berdi, dep habarlaidy "Ult aqparat".
Úkimet basshysy keltirgen málimet boiynsha, densaýlyq saqtaý júiesinde 254 myńǵa jýyq meditsinalyq qyzmetker jumys isteidi. Onyń ishinde 74 myń dáriger bolsa, 180 myńy orta meditsinalyq qyzmetkerler.
«2020 jyldan bastap meditsina qyzmetkerleriniń jalaqysyn kezeń-kezeńimen arttyrý kózdelip otyr. Meditsinalyq qyzmet kórsetýge arnalǵan tarifter aqysyz meditsinalyq kómektiń kepildendirilgen kólemi jáne mindetti áleýmettik meditsinalyq saqtandyrý júiesi aiasynda artty. Bul dárigerlerdiń jalaqysyn orta eseppen 30%-ǵa jáne orta meditsinalyq qyzmetkerlerdiń jalaqysyn 20%-ǵa kóterýge múmkindik berdi. Memleket basshysynyń tapsyrmasymen meditsina qyzmetkerleriniń jalaqysy jyl saiyn ósip, ortasha jalaqy deńgeii 2023 jylǵa deiin 2 ese artady. Pandemiia kezinde Úkimet koronavirýs infektsiiasyna, epidemiiaǵa qarsy is-sharalarǵa aralasqan densaýlyq saqtaý júiesiniń qyzmetkerlerine ústemeaqy tóledi», - deidi jaýabynda Asqar Mamin.
Premer-Ministr meditsina qyzmetkerleriniń qaýipsiz eńbek sharttaryn qamtamasyz etý maqsatynda qajetti sharalardyń bári qabyldanǵanyn habarlaidy. Meditsina uiymdarynyń bárinde jeke qorǵanys quraldarynyń qory jinaqtalǵan. Infektsiialyq statsionarlar men alǵashqy meditsinalyq-sanitarlyq kómek kórsetý uiymdarynda sanitarlyq-epidemiologiialyq talaptar qamtamasyz etilýde. Aimaqtardyń qajettiligine bailanysty jas mamandardy bólý júiesi engizilgen.
«Qazaqstan Respýblikasy azamattarynyń densaýlyǵy jáne densaýlyq saqtaý júiesi týraly» kodeksinde meditsina qyzmetkerleriniń mártebesin arttyrý, áleýmettik qamsyzdyǵyn retke keltirý, patsienttiń ómiri men densaýlyǵyna ziian keltirgen jaǵdaida kásibi jaýapkershiligin saqtandyrý boiynsha normalar qarastyrylǵan. Jańa normalarǵa sáikes, meditsina qyzmetkerleri qyzmettik mindetterin oryndaý kezinde issapar shyǵyndaryn, ómiri men densaýlyǵyna keltirilgen ziiandy óteýge, jergilikti biýdjetten áleýmettik qoldaý sharalaryn, qosymsha jeńildikter men yntalandyrý tólemderin alýǵa quqyly. Kodeks sonymen qatar memlekettik organdar men laýazymdy adamdardyń meditsina qyzmetkerleriniń kásiptik qyzmetine aralasýyn shekteýdi, meditsinalyq qyzmetkerlerdi ózderiniń kásibi mindetterimen bailanysty emes jumys túrlerine tartýǵa tyiym salýdy qarastyrady», - deidi Asqar Mamin.
Premer-Ministr sonymen qatar, aýyldy eldi mekenderde jáne aýyldarda, aýdandyq mańyzy bar qalalarda jumys isteitin memlekettik meditsinalyq uiymdardyń meditsinalyq qyzmetkerlerine jergilikti atqarýshy organdardyń sheshimi boiynsha turǵyn úidi mindetti túrde berý, járdemaqylardy mindetti túrde tóleý, kommýnaldyq shyǵyndardyń ornyn toltyrý úshin áleýmettik qoldaý kórsetý sharalary qarastyrylǵanyn málim etti.
«Memleket basshysynyń tapsyrmasyn oryndaý maqsatynda meditsina qyzmetkerlerin quqyqtyq jáne qarjylyq qorǵaý júiesin engizý máseleleri pysyqtalýda. Osylaisha, qazirgi ýaqytta meditsina qyzmetkerleriniń materialdyq qamtamasyz etý men kásibi qorǵaýdyń negizgi máseleleri kodekste qarastyrylǵan. Osyǵan bailanysty «Meditsina qyzmetkeriniń mártebesi týraly» jeke zań ázirleýdiń qajettigi joq dep sanaimyn», - dep túidi Asqar Mamin.
