Ótken táýlikte (14 qarasha) Qazaqstanda Covid pen oǵan uqsas pnevmoniiamen aýyrǵan 856 adam tirkeldi. Olardyń 630-ynan PTR testi nátijesinde koronavirýs anyqtalsa, qalǵan 226 kisi "koronavirýstyq pnevmoniia" dertine shaldyqqan. Bir táýlik ishinde Covid-ten jeti adam, "koronavirýs pnevmoniiasynan" eki adam kóz jumdy.
Sóitip, Qazaqstanda koronavirýs infektsiiasymen jáne soǵan uqsas pnevmoniiamen aýyrǵandar sany 160 myńnan asty.
Bir táýlikte koronavirýstan 368 adam jazylyp shyqqan.
Aimaqtar boiynsha qarasaq, indet ádettegidei shyǵys jáne soltústik óńirlerde órship tur. Koronavirýs infektsiiasy test arqyly anyqtalǵandardyń aimaqtar boiynsha kórsetkishteri:
- Nur-Sultan – 48;
- Almaty – 45;
- Shymkent – 5;
- Aqmola oblysy – 34;
- Aqtóbe oblysy – 3;
- Almaty oblysy– 28;
- Atyraý oblysy– 12;
- Shyǵys Qazaqstan oblysy – 236;
- Jambyl oblysy – 4;
- Batys Qazaqstan oblysy – 40;
- Qaraǵandy oblysy – 17;
- Qostanai oblysy – 52;
- Qyzylorda oblysy – 0;
- Mańǵystaý oblysy – 1;
- Pavlodar oblysy – 50;
- Soltústik Qazaqstan oblysy – 54;
- Túrkistan oblysy – 1.
Soltústik aimaqtarda koronavirýs juqtyrǵandardyń kúrt ósýine Reseimen ortaq shekara sebep deidi bilik organdary. Shekaradaǵy tekserý kezinde Reseiden kelgenderdiń Covid-ke shaldyqqany kóp anyqtalady.
— Dál osy aimaqtarda júris-turys kóbeiip, soǵan qatysty suraqtar týyndady. Sondyqtan ári-beri kóshi-qondy shekteý jáne memlekettik shekarada baqylaýdy kúsheitý boiynsha tiisti sharalar qabyldadyq. Shekaradan ótip jatqan bizdiń azamattar arasynda [koronavirýs] kóp tirkelip jatqan jaǵdailar bar. [memlekettik shekaradan] ótý kezindegi shekaralyq aimaqta [Covid juqtyrǵan] 361 adam anyqtaldy. Olardyń 350-i – Reseiden kelgender, – dedi Densaýlyq saqtaý vitse-ministri, bas memlekettik sanitarlyq dáriger Erlan Qiiasov Ortalyq kommýnikatsiia qyzmetinde ótken brifingte.
Qiiasovtyń aitýynsha, soltústik jáne shyǵys aýdandarda PTR testpen qamtý kólemi basqa aimaqtardan joǵary. Aýa temperatýrasy ońtústik aýdandarǵa qaraǵanda anaǵurlym tómen bolǵandyqtan, soltústikte virýstyq respiratorlyq infektsiianyń kóbirek bolýy da osynyń bir sebebi.
