14 shildede Qazaqstanda 5314 adamnyń koronavirýs testi oń shyqty. Bul – koronavirýs kórsetkishi boiynsha jańa rekord. Buǵan deiin bir kúnde osynsha kóp naýqas tirkelmegen. Sonymen qatar PTR testi teris shyqqan 127 adamǵa koronavirýs pnevmoniiasy diagnozy qoiyldy.
Ótken aptadan beri koronavirýstyń rekordtyq kórsetkishi qatarynan birneshe kún úzdiksiz jańaryp keledi.
Elde virýs kúsheidi. Densaýlyq saqtaý ministrligi bir kún buryn pessimistik boljam boiynsha, tamyz aiynda kúnine 6 myńnan astam naýqas tirkeledi dep málimdegen.
Bilik organdary indettiń órshýin koronavirýstyń "delta variantymen" bailanystyrady. Úndistanda anyqtalǵan bul variant Qazaqstanda alǵash ret maýsymnyń sońynda tirkelgen. Jańa variant alǵashqy variantqa qaraǵanda edáýir juqpaly.
14 shildede Nur-Sultanda 1576 adamnan koronavirýs tabylǵan. Indet bastalǵaly beri astanada bir kúnde osynsha kóp naýqas tirkelmegen. Almatyda – 850, Qaraǵandy oblysynda – 603, Atyraý oblysynda – 299, Shymkentte – 416, Batys Qazaqstan oblysynda – 234, Aqmola oblysynda – 160, Mańǵystaý oblysynda – 189, Pavlodar oblysynda - 156, Aqtóbe oblysynda – 204, Almaty oblysynda – 144, Qostanai oblysynda 104 naýqas tirkeldi. Qalǵan oblystarda ondaǵan naýqas anyqtalǵan.
Qazaqstanda koronavirýspen bailanysty adam ólimi kórsetkishi de joǵary. 13 shildede 57 adam koronavirýstan qaitys bolǵan: 47 adam – koronavirýstan, 10 adam koronavirýs pnevmoniiasynan kóz jumdy dep aitylady.
Resmi málimet boiynsha, Qazaqstanda 2020 jyldyń naýryz aiynan beri 472 106 adamnyń koronavirýs testi oń shyqqan. 4816-y qaitys bolǵan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Úkimet byltyr tamyzdan beri koronavirýsqa uqsaityn pnevmoniia esebin júrgizip keledi. 13 shildege deiin 58 213 adam pnevmoniianyń osy túrine shaldyqqan. 3514-i qaitys bolǵan. Eki kún buryn 127 adam koronavirýs pnevmoniiasyna shaldyqqan. Bilik bul derekti koronavirýstyń negizgi statistikasyna qospai otyr.
15 shildede Qyzylorda oblysy "qyzyl aimaqtar" qataryna kirdi. Osylaisha qazir "qyzyl aimaqta" úsh iri qala men 10 oblys tur: Nur-Sultan, Almaty, Shymkent qalalary, Pavlodar, Atyraý, Qaraǵandy, Aqmola, Qostanai, Aqtóbe, Mańǵystaý, Batys Qazaqstan, Soltústik Qazaqstan, Qyzylorda oblystary. Algoritmge sáikes, "qyzyl aimaqtarda" karantin kúsheiedi. "Sary aimaqta" Almaty oblysy, Jambyl men Qyzylorda oblystary qalǵan. Túrkistan men Shyǵys Qazaqstan oblystary "jasyl aimaqta".
Qazir Qazaqstan boiynsha 47 myń adam koronavirýstan emdelip jatyr. 15,2 myńy statsionarda jatyr. 126 adam jasandy tynys apparatyna qosylǵan.
Qazaqstanda aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 705 myń adam vaktsinanyń keminde bir dozasyn alǵan. 2 mln 597 myń adam vaktsinanyń eki dozasyn alǵan.
Djons Hopkins ýniversitetiniń málimetinshe, álemde indet bastalǵaly beri 188 mln 302 myń adam koronavirýsqa shaldyqqan. 4 mln 57 myńy qaitys bolǵan.
