«Elektrondy úkimet» portalynyń eGovMobile mobildi qosymshasynda koronavirýs belgilerin anyqtaý úshin onlain saýalnamadan ótýge bolady, dep habarlaidy "Ult aqparat" QR Densaýlyq saqtaý ministrligine silteme jasap.
Qyzmettiń bul túri QR Densaýlyq saqtaý ministrligi men «Ulttyq aqparattyq tehnologiialar» AQ birlesken jumysynyń nátijesinde jasaldy.
«Koronavirýstyń belgilerin anyqtaý boiynsha ózin ózi onlain diagnostikalaý qyzmeti eGovMobile qosymshasynyń basty betinde «COVID-19 belgileri boiynsha saýalnama» ataýymen jeke batyrma retinde ornalasqan. Qyzmet úsh tilde (qazaqsha, oryssha, aǵylshynsha) qoljetimdi. Saýalnamany toltyrý úshin azamattar 12 suraqqa Iá/Joq dep jaýap beredi, qajet bolǵan jaǵdaida jeke aqparattardy engizedi. Toltyryp bolǵannan keiin «Saýalnamany jiberý» batyrmasyn basý kerek», delingen habarlamada.
Aqparat ary qarai óńdeýden ótý úshin QR Densaýlyq saqtaý ministrligine túsedi.
Sonymen qatar, azamattar eGovMobile arqyly «COVID-19 kartasy», «COVID-19 týraly FAQ» qyzmetterinen koronavirýs týraly jii qoiylatyn suraqtarǵa jaýap ala alady. Sondai-aq mobildi qosymsha naqty ýaqyt rejiminde Qazaqstan aýmaǵyndaǵy virýstyń taralý jaǵdaiy men indeti rastalǵandarmen qatynasta bolǵandar jaily ózekti aqparattardy usynady.
