Foto:Ashyq derekkózden
Áleýmettik zertteýlerge sáikes, batys elderinde jastardyń ata-ana bolýdan sanaly túrde bas tartý ideologiiasy keń tarap jatyr. Ondai adamdardy - chaildfri deidi, iaǵni aǵylshyn tilinen tikelei aýdarǵanda childfree - baladan azat.
Qazaqstanda chaildfrilerdi anyqtaý úshin arnaiy statistika júrgizilmegen. Biraq ranking.kz saitynyń mamandary bul suraqqa jaýap izdeýge tyrysyp kóripti. Olardyń aitýynsha adamdardyń BAQ ókilderine bergen suhbattary men áleýmettik jelige jazǵan jazbalarynan ata-ana bolýdan sanaly túrde bas tartý úrdisi bizde de bar ekenin baiqaýǵa bolady.
Qazaqstanda úi sharýashylyqtarynyń sany men quramy qansha ekenine taldaý Ulttyq halyq sanaǵy kezinde ǵana júrgiziledi. Bul derekten tek qana Qazaqstanda qansha erli-zaiyptyda bala joq ekenin anyqtaýǵa bolady. 2021 jyly ótken sońǵy halyq sanaǵy kezinde elde mundai otbasylar - 656,5 myń bolǵan. 2009 jyldan beri ondai otbasylardyń sany 73,8% artqan. Ondai otbasylardyń kóbi qalaly jerde turatyndar eken. Aita keteiik, Ulttyq statistika biýrosynyń sarapshylary bul juptardyń balalary bar-joǵyn, basqa týystarymen birge turatynyn nemese óz betinshe bólek turatynyn kórsetpeidi. Olar erli-zaiyptylar otyz jasqa tolǵan ba, joq pa ekenin ǵana kórsetetin kórinedi. 2021 jyly ondai januialar sany 92,9 myń bolǵan. Bul onyń aldynda bolǵan Ulttyq sanaqtan eki ese kóp.
Qazaqstanda áielder orta eseppen 25,2 jasta turmysqa shyqsa, 30 jastan asqanda ǵana balaly bola alatyn kórinedi. 2021 jyly elimizde 21,4 myń adam meditsinalyq sebeptermen bala taba almaityny anyqtalǵan.
Wikipedia.org saitynda jazǵan aqparattar boiynsha álemde chaildfrilerdiń balaly bolmaýynyń júzden astam sebebi bolsa, Qazaqstandaǵy BAQ negizinen ekonomikalyq jáne áleýmettik sebepti aitady eken. Olardyń keibireýi ata-anasynda bolǵan materialdyq qiyndyq ózderinde jáne balalarynda bolmaǵanyn qalaǵandyqtan balaly bolýdan bas tartsa, kei bireýiniń chaildfri bolýyna bala kezinde ózinen kishi baýyrlaryn baqqany jaǵymsyz áser qaltyrǵandyqtan eken.
Álemde chaildfrilerdiń túrli qaýymdastyqtary bar. Al Qazaqstanda ondai uiym 2018 jyly qurylǵan. Áleýmettik jelide ol uiymdy qurýshylar "Iajmaterinstva" qaǵidatyna qarsy ekenderin, balaly bolý mádenietin ózgertýdi qalaitynyn jáne qoǵamnyń nemqurailylyǵyn qoldamaityndyǵyn aitady eken.
Qazaqstanda bala týý kórsetkishi 2018 jyldan 2021 jylǵa deiin ósken, alaida odan keiin tómendegeni baiqalady. Mamandar 2027 jylǵa deiin bala týý azaiady, odan keiin qaita kóteriledi dep boljaidy.
