© pixabay / irfanahmad
Qazaqctanda "Onlain-platformalar jáne onlain-jarnama týraly" zań kúshine endi. Budan bylai blogerler jalǵan aqparat taratqany úshin ákimshilik jaýapqa tartylady. Al internette jarnama jasaityndar jeke kásipker retinde tirkelýi shart, dep habarlaidy Sputnik Qazaqstan.
Toqaev qol qoiǵan zańda "onlain-platforma paidalanýshysy" jáne "infliýenser (bloger)" degen uǵymdardyń anyqtamasy jazyldy. Sondai-aq olardyń quqyqtary men mindetteri kórsetilgen. Al onlain-platforma ieleri jalǵan aqparatpen kúres jáne salyqtan jaltarý boiynsha memlekettik organdarmen birlesip jumys isteýge mindetteledi.
Ol úshin internet platformanyń zańdy ókili belgilenedi. Al platformanyń ózinde paidalanýshylardyń sanyn anyqtaityn baǵdarlama ornatylady.
Zańǵa qaishy kontent anyqtalǵan jaǵdaida zańdy ókilge ol aqparatty joiýǵa habar beriledi. Talap oryndalmasa, quziretti organ onlain-platformanyń qyzmetin shekteýge quqyly. Al adam ómirine qaýip tóndiretin kontent jariialansa, onlain-platformanyń zańdy ókili quqyq qorǵaý organdaryna habar berýge tiis.
Balaǵa kiberbýlling jasalǵan jaǵdaida ondai akkaýnttar buǵattalýy shart. Sondai-aq zańda onlain-platformalardyń interfeisine memlekettik tildi integratsiialaý mindeti engizildi. Sonda qazaq tilindegi kontent te qadaǵalanady. Búginde jarnamanyń alpys paiyzy internette jariialanady. Onyń kólemi trilliondaǵan aqsha bolýy múmkin.
Zań boiynsha internet arqyly tabys tabatyn blogerler endi salyq tóleýge mindetteledi. Internette jarnamamen aqsha tabatyn adamdar kásipker retinde tirkelýi kerek. Sondai-aq óz paraqshasynda onlain-jarnama jariialaǵanda jarnamanyń belgisin qoiýǵa mindetti.
Jalǵan aqparat úshin jaýapkershilik
Zań jobasyndaǵy taǵy bir jańashyldyq – jalǵan aqparat úshin salynatyn aiyppul.
Osyǵan bailanysty Ákimshilik quqyq buzýshylyq týraly kodekske "456-2" degen jańa bap engiziledi. Onda onlain platforma paidalanýshylary men blogerlerge jalǵan aqparat taratqany úshin ákimshilik jaýapkershilik qarastyrylǵan.
Ákimshilik aiyppul somasy:
• jeke tulǵalar úshin 20 AEK (69 000 teńge);
• kásipkerlik qyzmetpen ainalysatyn blogerler úshin – 30 AEK (103 500 teńge);
• shaǵyn kásipkerlik sýbektileri, kommertsiialyq emes uiymdar úshin - 40 AEK (138 000 teńge);
• orta kásipkerlik sýbektileri úshin – 80 AEK (276 000 teńge);
• iri kásipkerlik sýbektileri úshin – 100 AEK (345 000 teńge).
Al quqyq buzýshylyq bir jylda qaitalansa, aiyppuldyń kólemi eki esege ósedi. Tipti, qamaýǵa alý jazasyn da qoldanýy múmkin:
• jeke tulǵalarǵa - 40 AEK (138 000 teńge) nemese 10 táýlikke deiingi merzimge ákimshilik qamaýǵa alý;
• blogerlerge - 15 AEK (51 750 teńge) mólsherinde aiyppul nemese 15 táýlikke deiingi merzimge ákimshilik qamaýǵa alý;
• shaǵyn kásipkerlik sýbektileri men kommertsiialyq emes uiymdarǵa - 60 AEK (207 000 teńge);
• orta kásipkerlik sýbektilerine - 120 AEK (414 000 teńge); iri kásipkerlik sýbektilerine - 250 AEK (862 500 teńge).
