Orta kásipkerliktegi belsendi kásiporyndar sanynyń qysqarýy úrdisi tirkelip otyr. Bul týraly Parlament Senatynyń Tóraǵasy Máýlen Áshimbaev málim etti, dep habarlaidy QazAqparat.
«Shaǵyn jáne orta biznesti damytý úshin mańyzdy talaptardyń biri – ol nesielik resýrstarǵa qoljetimdik. Sońǵy jyldardyń statistikasyna qaraǵanda, shaǵyn jáne orta bizznesti (ShOB) bank tarapynan nesielý birtindep tómendegeni baiqaldy. 2017 jyldan ShOB sýbektilerine arnalǵan banktik zaimdar 22 paiyzǵa qysqardy, 5 trln teńgeden 4,1 trln teńgege deiin. Sonymen qatar osy merzimde jeke tulǵalardy nesielendirý 64 paiyzǵa ósti», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saiasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aitýynsha, kásipkerlikti jańa bastaǵandar men mikrobizneske nesie alý qiynǵa túsedi. Olardyń kóbinde kepildi múlik pen jetkilikti ainalym qarjysy bolmaidy.
Bankter qaryz alýshylardyń osy sanatyn nesieleýge asyqpaidy, sebebi iri klientterge ǵana ekpin qoiylǵan. Bul baǵytta bankterde óz múddesi bar, iaǵni táýekelder men tabystyń deńgeiin nazarǵa alyp otyr. Osy jaǵdaida mikrobiznes ieleri jeke tulǵalar siiaqty jyldyq 20-25 paiyzben qarjy qaryzyn alýǵa májbúr bolady.
«Biznesti memlekettik qoldaý tetikterin jetildirýdi jalǵastyrý kerek. Ásirese, aqparattyq-túsindirý bóligine nazar aýdarý qajet», - dedi Senat Tóraǵasy.
Zertteý málimetterinshe, kásipkerler kóbine ózine qajet konsýltatsiialardy almaidy. Shaǵyn biznes memlekettik qoldaý sharalary jaiynda bilmei jatady.
«Osy oraida biryńǵai úilestirý ortalyǵy jáne aqparattyq portal kerek bolar, iaǵni kásipkerler «jalǵyz tereze» qaǵidaty boiynsha kómek alar edi», - dedi M. Áshimbaev.
