QR Premer-Ministri Asqar Maminniń tóraǵalyǵymen ótken Úkimet otyrysynda Memleket basshysynyń 2020 jylǵy 1 qyrkúiektegi Joldaýyn iske asyrý jónindegi sharalar qaraldy. QR ulttyq ekonomika ministri Rýslan Dálenov baiandama jasady, dep habarlaidy primeminister.kz saity.
Memleket basshysy el halqyna «Jańa jaǵdaidaǵy Qazaqstan: is-qimyl kezeńi» atty Joldaýynda turaqty ekonomikalyq ósýdi qamtamasyz etý, ómir súrý sapasy men deńgeiin arttyrý boiynsha naqty mindetter qoidy.
Qazaqstan Respýblikasynyń Ulttyq ekonomika ministrligi bes negizgi baǵyt boiynsha jumys isteidi:
- Kásipkerlikti damytý.
- Salyq-biýdjet saiasatyn jetildirý.
- Investitsiialardy yntalandyrý.
- Teńgerimdelgen óńirlik damý.
- Memlekettik basqarý.
Kásipkerlikti damytý
Shaǵyn jáne orta bizneske qosymsha kómek kórsetý maqsatynda shaǵyn jáne orta biznestiń qazirgi kreditteri boiynsha paiyzdyq mólsherlemelerdi sýbsidiialaý júzege asyrylady, ári túpkilikti jyldyq mólsherlemeleri 6%-ǵa deiin jetkiziledi. Sýbsidiialaý tótenshe jaǵdai jariialanǵan kezden bastap 12 ai merzimdi qamtidy. Bul shara «Biznestiń jol kartasy-2025» memlekettik baǵdarlamasynyń jańa baǵyty aiasynda iske asyrylady.
«Biznes ahýaldy odan ári jaqsartý boiynsha sharalar kesheni qabyldanady. Oǵan táýekelderdi basqarý júiesin avtomattandyrý, tiisti komissiia qurý arqyly barlyq retteýshilik talapty qaita qaraý jáne olardy azaitý boiynsha usynystar ázirleý kiredi. Kásipkerlik kodekske tiisti ózgerister engizý arqyly retteýshilik apelliatsiia institýtyn engizý boiynsha sharalar qabyldanady», — dep málimdedi Rýslan Dálenov.
Sondai-aq qarjylai jáne qarjylai emes memlekettik qoldaý sharalaryn iske asyrý jalǵasady. Tutastai alǵanda bul 2025 jylǵa qarai shaǵyn jáne orta biznestiń jalpy ishki ónimdegi úlesin 35%-ǵa deiin, shaǵyn jáne orta bizneste jumyspen qamtylǵandar sanyn 4 million adamǵa deiin ulǵaitý boiynsha qoiylǵan mindetterge qol jetkizýge yqpal etedi.
Salyq-biýdjet saiasatyn jetildirý
Búgingi kúni Salyq kodeksinde 12 salyq, 48 kishi salyq túri, 10 tólemaqy jáne 6 alym kózdelgen. Tiisinshe, salyqtar men tólemder sanyn barynsha azaitý boiynsha jumys júrgiziledi.
Ekonomikanyń asa kóp zardap shekken sektorlary úshin balamaly negizde ainalymnan bólshek saýda salyǵyn tóleý quqyǵyn qoldaný máselesi zerdelenedi. Sondai-aq salyq mólsherlemelerin saralaý múmkidikteri qaralady. Biýdjettiń túiindi koeffitsentteri jiyntyǵy ázirlenip, biýdjet saiasatynyń tiimdiligi men turaqtylyǵyn baǵalaý engiziledi.
«Keńeitilgen biýdjetti» engizý sheńberinde shoǵyrlandyrylǵan biýdjetke biýdjetten tys qorlardy qosý arqyly memlekettik qarjyny keshendi baǵalaý engiziledi.
Investitsiialardy yntalandyrý
Investitsiialyq jobalardy iske asyrýdyń barlyq merzimine zańnamalyq talaptardyń turaqtylyǵyn qamtamasyz etý maqsatynda Strategiialyq investitsiialyq kelisimder engiziledi.
Osy maqsatta Kásipkerlik jáne Salyq kodeksterine, sondai-aq «Arnaiy ekonomikalyq aimaqtar týraly» zańǵa túzetýler qarastyrylady. Strategiialyq investitsiialyq jobalar pýly qalyptastyrylady. Barlyq joba Investitsiialardy tartý jónindegi úilestirý keńesinde qaralady.
Jobalardyń iske asyrylý tiimdiligin arttyrý úshin árbir iri investordy jeke tásilmen qamtamasyz etý boljanady.
Investitsiialyq jobalardy iske asyrý protsesinde zamanaýi infraqurylymdy, aǵylshyn zańnamasyn jáne jeńildetilgen salyq jáne kóshi-qon rejimin usynatyn «Astana» halyqaralyq qarjy ortalyǵynyń áleýeti belsendi paidalanylady.
Teńgerimdelgen óńirlik damý
Elimizdiń óńirlik damýyna árbir naqty óńirdiń básekelestik artyqshylyǵyn kórsetý jónindegi sharalardy qamtityn jańa tásilder ázirlenedi. Bul úshin 2030 jylǵa deiingi aýmaqtyq-keńistiktik damýdyń boljamdy shemasyna tiisti ózgerister engiziledi. Aýyldardaǵy ózekti infraqurylymdyq máselelerdi sheshýge baǵyttalǵan «Aýyl el besigi» jobasyn belsendi iske asyrý jalǵasady.
Jergilikti ózin-ózi basqarýdy jetildirý sheńberinde aýyl okrýgteri biýdjetiniń qarjylyq múmkindikteri keńeitiledi (salyqtar men tólemderdiń tórt túri beriledi).
Jergilikti ózin-ózi basqarýdy damytýdyń jańa tujyrymdamasy ázirlenedi. Bul Tujyrymdama sheńberinde aýyl ákimderin tikelei sailaýdy engizý, jergilikti memlekettik basqarýdyń múliktik quqyqtaryn jáne máslihattardyń ókilettikterin keńeitý boiynsha usynystar daiyndalady.
Memlekettik basqarý
Memlekettik apparatty jáne kvazimemlekettik sektor jumyskerlerin qysqartý sheńberinde 2020 jyly olardyń sany 10%-ǵa, kelesi jyly taǵy 15%-ǵa qysqarady.
Kásipkerlikti qoldaý sheńberinde memleket pen kvazimemlekettik sektordaǵy jyljymaityn múlik obektileri boiynsha shaǵyn jáne orta biznes úshin jaldaý tólemaqysyn esepteý jyl sońyna deiin toqtatylady.
Ekonomikany odan ári memleket ieliginen shyǵarý úshin 2025 jylǵa deiin jekeshelendirýdiń jańa jospary qabyldanady.
