Qazaqstanda bir jylda 45 myń bet dárilik nusqaýlyqtar aýdaryldy, dep habarlaidy "Ult aqparat" Dárilik zattar men meditsinalyq buiymdardy saraptaý ulttyq ortalyǵynyń (DZSUO) baspasóz qyzmetine silteme jasap.
Baspasóz qyzmeti taratqan málimtterge qaraǵanda, Dárilik zattar men meditsinalyq buiymdardy saraptaý ulttyq ortalyǵy qazaqstandyq naryqqa kelip túsetin dáriler men meditsinalyq buiymdardy meditsinalyq qoldaný jónindegi nusqaýlyqtardy memlekettik tilge aýdarý jáne zańnamamen reglamenttelgen nusqaýlyqtar, qaptama maketteri, zattańbalar, stikerler, jarnamalyq materialdar aýdarmalarynyń sáikestiligin tekserý qyzmetterin saraptama sheńberinde oryndaityn elimizdegi birden bir uiym.
Ótken jyly Ulttyq ortalyqta 100 myńnan astam paraq memlekettik tilge aýdarylǵan jáne sáikestik turǵysynan tekserilgen, bul aldyńǵy jylmen salystyrǵanda 23% kóp. Onyń 45 myńnan astamy – nusqaýlyqtar aýdarmasy. Qazaqstanda árbir dárilik zattyń qazaq jáne orys tilderinde tolyq sipattamasy bolýy kerek ekeni belgili, óitkeni ol patsientti preparat týraly: quramy, shyǵarylý túri, qoldanylýy, qarsy kórsetilimderi, dozalaý rejimi, basqa dárilermen ózara árekettesýi jáne t.b. jóninde qajetti aqparatpen tanystyratyn mańyzdy qujat.
«Dárilik nusqaýlyq patsient úshin durys qabyldanǵan preparattyń emdik áseriniń bolýy jáne onyń densaýlyǵy men ómirine tónetin qolaisyz zardaptardan saqtandyrýynyń kepili bolyp tabylady. Sondyqtan nusqaýlyq mátini tek meditsinalyq qyzmetkerge ǵana emes, sondai-aq árbir patsientke túsinikti bolý úshin onyń aýdarmasy óte sapaly bolýy tiis. Óitkeni, preparattyń ańdatpa-mazmunynda qatelik bolǵan jaǵdaida patsientter zardap shegýi múmkin. Al bql ulttyq qaýipsizdikpen bailanysty másele», – dep atap ótedi DZSUO bas direktorynyń dárilik zattar jónindegi orynbasary Baian Moldahmetova.
Onyń sózinshe, dárilik preparattar nusqaýlyqtarynyń mazmuny preparattyń ózin meditsinalyq qoldaný barysynda ózgerýi múmkin ekenin eske salamyz. Sonymen, elimizde tirkelgen dárilik zattar búkil tirshilik ainalymy boiyna qaýipsizdik monitoringinen ótkiziledi. Basqa preparattarmen ózara árekettesýi kezinde buryn nusqaýlyqta kórsetilmegen jaǵymsyz reaktsiialar nemese emdik áseri anyqtalǵan jaǵdaida der mezgilinde ózektilendirý úshin qoldanystaǵy nusqaýlyqtarǵa ózgerister engizilýi tiis.
