Oqýshylardyń bilimin halyqaralyq baǵalaý boiynsha Qazaqstan damyǵan elderden artta qalyp keledi. Bul týraly QR Prezidenti Qasym-Jomart Toqaev aitty, dep habarlaidy QazAqparat.
«Oqýshylardyń bilimin halyqaralyq baǵalaý boiynsha Qazaqstan damyǵan elderden artta qalyp keledi. Onyń birneshe sebebin keltirýge bolady. Biraq onyń basty sebebi – bilim salasyna bólinetin qarajattyń jetispeýshiligi jáne osyndai mańyzdy salada reformalardyń júieli bolmaýy», - dep atap ótti Memleket basshysy Ulttyq qoǵamdyq senim keńesiniń onlain formattaǵy 3-otyrysynda.
Prezidenttiń aitýynsha, bilim berý – ekonomikanyń óte mańyzdy salasy.
«Bilim salasyna bólinetin qarajattyń jetispeýshiliginiń de óz sebepteri bar. Kórpege qarai kósilý kerek degendei, qarajatqa qarai ómir súrý kerek. Biraq, orta eseppen bir oqýshyǵa jylyna myń dollardan az qarajat bólemiz. Al PISA reitingindegi úzdik ondyqqa kiretin elder bir balaǵa 10-14 myń dollar bóledi. Buǵan kóńil bólýim de tegin emes. Sapaly bilim berýdiń bazalyq jaǵdaiy – zamanaýi normalarǵa, jabdyqtaý standarttaryna, ergonomikaǵa sai keletin mektep infraqurylymy. Qazaqstan mektebine jaqsy jabdyqtalǵan jáne bala sany az synyptar qajet. Ol úshin de birqatar qadam jasaldy. Memlekettik bilim berý baǵdarlamasy boiynsha 2025 jylǵa qarai 650 myńnan astam orynǵa 800 myń jańa mektep salynady, aýyldyq mektepterge 114 internat jáne 700-den astam sport zaldary turǵyzylady», - dedi Q. Toqaev.
