Densaýlyq saqtaý ministri Eljan Birtanovtyń aitýynsha, JOO túlekterin tartýdyń arqasynda biyl dárigerler tapshylyǵy 900-ge azaiǵan, dep habarlaidy QazAqparat.
«Qazirgi ýaqytta 2019-2020 jyldarǵa arnalǵan alǵashqy meditsinalyq-sanitariialyq kómekti damytý jospary iske asyrylyp jatyr. Osy jyly 1 300 dárigerlik bólimshe ashyldy. Ár bólimsheniń júktemesi - 1 658 adamnan keledi. Alaida kadrlardyń jumysty qosa atqarýy men tapshylyǵyna bailanysty 1 dárigerge is júzinde bekitilgen halyq sany 1 900 adamdy qurap otyr», - dedi Eljan Birtanov Senatta ótken Úkimet saǵatynda.
Ministrdiń aitýynsha, JOO túlekterin jumysqa tartýdyń arqasynda biyl alǵashqy meditsinalyq kómek dárigerleriniń tapshylyǵy 900 adamǵa azaiǵan.
«Tsifrlandyrýdyń arqasynda emhanalardaǵy kezek 30 paiyzǵa tómendedi. Shuǵyl sipattan tys shaqyrýlar jedel járdem qyzmetinen bólimshe dárigerlerine berilgennen keiin jyl ishinde jedel járdem shaqyrýlary 25 paiyzǵa tómendedi. Aýrýlardy basqarý baǵdarlamalaryna 462 myń adam qatysyp jatyr. Nátijesinde baǵdarlamaǵa qatysatyn aýrýlardy statsionarlarǵa emdeýge jatqyzý 2,5 esege tómendedi», - dedi ol.
Eljan Birtanov atap ótkendei, 2022 jylǵa deiin memlekettik-jekeshelik áriptestikti qosa alǵanda elimizde 595 alǵashqy meditsinalyq-sanitariialyq kómek nysany salynyp, jańartylady. Bul alǵashqy kómek nysandaryn úlkeitip, olardyń qoljetimdiligin qamtamasyz etýge múmkindik beredi.
