Memleketimizde ekonomika suranysyna sai mamandar daiyndaý kerek desek – elimizde ulttyq biliktilik júiesin qalyptastyrýymyz qajet. Bul týraly Kásiptik standarttardy ázirleý jónindegi basqarýshy komitettiń otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Ulttyq biliktilik júiesi úsh bólimnen turady. Birinshi, jumys berýshiniń jumysqa alatyn adamnyń bilimine, daǵdysyna qoiatyn talaby. Sol talapty «kásiptik standart» dep ataimyz. Ekinshi, Kásiptik standartty ázirlegennen keiin oǵan bizdiń bilim berý standarttary men baǵdarlamalary beiimdelýi kerek. Sonda bilim berý oshaqtary biznestiń, ekonomikanyń suranysyna sai mamandar daiyndaidy. Sonda ǵana elimizde suranysqa sai, bilimdi, bilikti mamandar daiyndalady. Ulttyq biliktilik júiesiniń úshinshi bóligi – alǵan bilimdi táýelsiz baǵalaý, iaǵni sertifikattaý», - deidi Birjan Nurymbetov.
Onyń aitýynsha, diplom – bilimdi rastaityn qujat, biraq damyǵan memleketterde mamannyń diplomyna qaramaidy.
«Damyǵan elderde mamannyń diplomyna qaramaidy. Olar biliktilikti rastaityn táýelsiz ortalyqtarǵa jiberedi. Ol ortalyq biliktiligin rastaityn sertifikat beredi. Sertifikattyń quny diplomnan joǵary. Biz osyndai júieni qalyptastyrý ústindemiz», - deidi ministr.
Sondai-aq, jiynda Dúniejúzilik banktiń zertteýi boiynsha, ekonomikamyzdy tolyq qamtý úshin 550 kásiptik standart qajet ekendigi aityldy.
«Byltyr osy joba arqyly 70 kásiptik standart ázirlendi. Biyl jyl sońyna deiin 480 standartty ázirleýimiz kerek. Biz ekonomister men zańgerlerdi ǵana daiyndap jatyrmyz. Bul – úlken problema, sebebi eńbek naryǵynyń suranysy basqasha. Zertteý jumystarynyń nátijesinde eńbek naryǵynyń 75% suranysy joǵary bilimdi mamandarǵa emes, orta arnaiy kásibi bilim mamandaryna ekeni anyqtalǵan», - deidi ol.
Onyń aitýynsha, ár adam balasy joǵary bilim alǵanyn, ekonomist, zańger bolǵanyn qalaidy, biraq eńbek naryǵynda suranys basqasha.
«Bizdiń maqsat – mamandyqtardy sol suranysqa sáikes keltirý. Ár salanyń ereksheligi ártúrli, biraq talaby bir: «Sol saladaǵy mamandar qandai bolý kerek?» degen talaptardy kásiptik standarttarǵa engizý. Kásibi standartty memlekettik organdar ǵana emes, dúniejúzilik bankpen birlese isteitin joba aiasynda jeke menshik kompaniialar da jasaidy», - deidi ministr.
