Qazaqstanda bedeýligi bar adamdardyń tizilimin jasaý qajet. Bul týraly Aqparat jáne qoǵamdyq damý ministrligi uiymdastyrǵan QR Prezidenti Joldaýy aiasyndaǵy áleýmettik basymdyqtardy talqylaýǵa arnalǵan dóńgelek ústel otyrysynda «Ekomed» Adam urpaǵyn órbitý emhanasynyń basshysy Saltanat Baiqoshqarova aitty, dep habarlaidy QazAqparat.
«Bedeýlik máselesimen ainalysqanyma 32 jyl bolypty. Onyń ishinde ekstrakorporaldy uryqtandyrý ádisiniń alǵashqy mamany retinde engizgenime 25 jyl tolypty. Biz kóbine aqyly túrde qyzmet kórsettik. 2010 jyldan bastap memleketimiz 100 kvotadan bastasa, biyl 1 myńnan sál asatyn kvotaǵa qol jetkizdik. Soǵan da qýanatynbyz. Biraq, keshegi Prezident Joldaýyndaǵy 7 myń kvota bólý sheshimi biz úshin úlken qýanysh boldy. Óitkeni, bizge keletin adamdardyń barlyǵy birdei 1 million teńge taba almaidy. Bul aqshanyń jartysy dárige ketedi. Sondyqtan bul úlken kómek jáne patsientterimizdiń barlyǵy qýanyp jatyr. Kútpegen jaǵdai boldy. Biz kóp bolsa 2 ese kóbeiter dep oilaǵan edik», - dedi ol.
Degenmen, ol bul kvota elimizdegi bedeýlik máselesin 100 paiyz sheshe almaityndyǵyna nazar aýdartty. Esepte turǵan patsientterdiń 60-70 paiyzyna 1 jyl ishinde múmkindik beretindigin atap ótti.
«Densaýlyq saqtaý ministrligimen biraz jumys istep, usynystar jasaǵanbyz. Ótken jyly ministrdi de shaqyryp, ortalyǵymyzdy kórsetken edik. Sol kezde kótergen máseleler áli sheshilgen joq. Endi Prezident Joldaýynan keiin ministrlikpen qyzý jumys isteimiz dep oilaimyn. Eń basty másele – elimizde bedeýliktiń tizilimi joq. Biz jalpy sózben «5, 6-shy otbasy bedeýlikpen betpe-bet keledi» dep aitamyz. Alaida, olardyń barlyǵyna arqaý bolatyn statistika joq. Sondyqtan tsifrlandyrý zamanynda qansha adam bedeýlikke ushyraǵandyǵyn anyqtaý qajet. Iaǵni, bedeý adamdardy tirkeý máselesin durystap, baza, tizilim jasaýymyz kerek. Densaýlyq saqtaý ministrliginiń buiryqtaryn, hattamalaryn ózgertýge tiispiz», - dedi Saltanat Baiqoshqarova.
