QR Qarjy vitse-ministri Marat Sultanǵaziev Qazaqstanda «bailyq salyǵyn» engizý máselesi 2022 jyly qaralatynyn aitty, dep habarlaidy QazAqparat.
Búgin Senattyń jalpy otyrysynda senator Murat Baqtiiaruly sán-saltanatty zattarǵa arnaiy salyq salý máselesin kóterdi.
«2019 jyly Prezident óz Joldaýynda «Jalpy ishki ónim men halyq tabysynyń artýyna qaramastan, qoǵamda múliktik jiktelý úderisi saqtalyp otyr. Bul - alańdatarlyq faktor. Sondyqtan oǵan erekshe nazar aýdarý kerek» degen bolatyn. Osyǵan bailanysty halyqaralyq tájiribede kóptegen elde bar, sán-saltanatqa arnaiy salyq engizý óte ózekti másele dep esepteimin. Bul jerde qymbat elitaly jyljymaityn múlikter, ushaqtar, iahtalar, qymbat avtokólikter, zergerlik buiymdar siiaqty sán-saltanatty zattarǵa arnaiy salyq salýdyń ádiletti júiesin qalyptastyrady dep oilaimyn. Bul turǵyda tiisti vedomstvonyń kózqarasy qandai», - dep surady senator.
Óz kezeginde vitse-ministr M. Sultanǵaziev bul másele qarastyrylyp jatqanyn aitty.
«Oǵan salyqty biz qarastyryp jatyrmyz. Osy oraida biznespen talqylaý jumystary júrip jatyr. Kelesi jyly Úkimettiń jobasymen engiziletin bolady», - dedi Marat Sultanǵaziev.
