Taiaý ýaqytta turǵyn úi naryǵynda qandai jait oryn alýy múmkin? Baspana baǵasy túsýi múmkin be? Dál osy máselelerge qatysty Qazaqstan rieltorlary birlesken qaýymdastyǵy prezidentiniń keńesshisi Nina Lýkianenko pikir bildirdi, dep habarlaidy QazAqparat.
«Karantin jaǵdaiynda jyljymaityn múlikke suranys keiinge qalyp jatyr. Ókinishke qarai, satýshylardyń basym bóligi oqshaýlaný kezeńinde jáne qalada júrip-turýǵa engizilgen shekteýge bailanysty satý jarnamalaryn alyp tastady. Bul bir jaǵynan nysandardy kórsetý múmkindiginiń joqtyǵyna jáne qaýipke de bailanysty», - deidi ol.
Sonymen qatar sarapshy jyljymaityn múlikke baǵanyń tómendeý múmkindigine de qatysty pikirimen bólisti.
«Ekonomikadaǵy qazirgi ahýal barlyq biznestiń tabysyna qatty áser etetini túsinikti bolyp tur. Demek, jekelei alǵanda árbir otbasynyń kirisine jáne ekonomikalyq jaǵdaiyna áser etedi degen sóz. Taýarlar men qyzmetterdiń baǵasy suranys tólem qabiletiniń yqpalymen jáne naryqtaǵy usynystarmen qalyptasady. Al tólem qabileti qatty zardap shekti jáne taiaý arada ońala qoimaidy. Taiaý ýaqytta ekonomikanyń belsendiligi jandanyp, kásiporyndar, shaǵyn jáne orta biznes jumysyn bastaǵanǵa deiin 2-3 ai ótedi. Sodan keiin baryp nysandarǵa arnalǵan mámileniń baǵasy birshama aiqyndalyp qalady. Qazirgi kezeńde taraptardyń árqaisysy óz qajettiligine qarai oilaidy. Satýshylar dollardyń baǵasy kóterilgenine arqa súiep, baǵany tym joǵary kóterip jiberse, satyp alýshylardyń basym bóligi dollar baǵamynyń kóterilgenin keltirip, baǵany negizsiz tómendetedi. Meniń boljamymsha, jyldyń sońyna deiin baǵa tómendeýi 7-10 paiyzǵa jetip qalady», - deidi Nina Lýkianenko.
Sarapshy naryqta turǵyn úi shamadan tys kóp degen pikirge qatysty oiyn bildirdi.
«Men olai oilamaimyn. Páterge suranys boldy, bolady jáne bola bermek. Adamdar dúniege keledi, ómirden ozady, qonys aýdarady, kóship ketedi, bas qosady jáne ajyrasady. Turǵyn úi ainalymy barlyq ýaqytta bolady. Buǵan qosa, jyljymaityn múlik nysandary óz aktivińdi saqtaýdyń jáne kóbeitýdiń basty tásilderiniń bir bolyp qala beretinin de esten shyǵarmaý kerek», - dedi ol.
