Qazaqstanda basqa eldermen salystyrǵanda jol qurylysynyń quny joǵary emes. Bul týraly QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
«Basqa eldermen salystyrǵanda Qazaqstanda avtojol qurylysynyń joǵary qunyna qatysty suraqtar jii qoiylyp jatady. Osy oraida, bizdiń avtomobil joldarynyń ortasha quny joldyń sanatyna, jol jabyndysynyń qurylymyna bailanysty 1 mln-nan 2,5 mln dollarǵa deiin jetetindigin atap ótkim keledi. Al kórshi elderde, Eýropa memleketterde ol 3 mln-nan 5 mln dollarǵa deiin jetedi», - dedi Berik Kamaliev Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, jobanyń quny joba-smetalyq qujattamanyń negizinde «Memsaraptama» RMK-nyń memlekettik saraptamasynan ótkennen keiin aiqyndalady. Al jumystardyń sapasy jumystardy qabyldaý jónindegi nusqaýlyqqa sáikes tekseriledi.
