Qazaqstan Prezidenti Qasym-Jomart Toqaev Úkimetke jyl sońyna deiin balany mektepke deiin damytýdyń tolyqqandy modeli ázirleýdi júktedi, dep habarlaidy QazAqparat.
«Muǵalim mamandyǵynyń mańyzy erekshe. Sol sebepti olardy erekshe jaǵdai jasaityn JOO-lar daiyndaýy kerek. Bilim salasyn qarjylandyrý jáne basqarý júiesin jetildirý talap etiledi. Bilim salasynyń barlyq satysyn basqarýdy jańǵyrtý kerek. Basqarýdyń kollegiialyq basqarý júiesin, baqylaýshy jáne qamqorshylyq keńesin qurý qajet. Balany jastan jetildirý júiesi de halyqaralyq standarttarǵa sai kelmeidi. Biz mektepke deiingi bilim berý salasyn belsendi túrde jetildirip, mektep baǵdarlamasymen sabaqtastyra bilýimiz kerek. Jýyq arada 3-6 jas aralyǵyndaǵy balalardy mektepke deiingi tárbiemen jáne bilimmen qamtý deńgeii 100 paiyzǵa jetetin bolady», - dedi Prezident Ulttyq qoǵamdyq senim keńesiniń otyrysynda.
Áitse de Memleket basshysy balany mektepke deiin damytýdyń tolyqqandy modeli joqtyǵyna nazar aýdardy.
«Úkimet ony jyldyń sońyna deiin ázirleýi kerek. Biz sonymen qatar balalardy qosymsha bilimmen barynsha qamtýymyz kerek. Bizdiń balalardyń sporttyq, intellektýaldyq, shyǵarmashylyq qyryn ashýda óte mańyzdy. Bul maqsatta jeke bastamashylyqty qoldaý kerek. Memlekettik tapsyrys qosymsha bilim berýdiń jeke uiymdaryna barynsha tiimdi jaǵdaida berilýi tiis. Ásirese bul aýyldar men shaǵyn, monoqalalar úshin mańyzdy», - dedi ol.
