Densaýlyq saqtaý ministri Aleksei Tsoi balalardy koronavirýsqa qarsy vaktsinalaý týraly suraqqa jaýap berdi, dep jazady Sputnik Qazaqstan agenttigi.
"Árine, bul tek erikti túrde, ata-analardyń kelisimimen ǵana jasalady. Biz tek balasyna ekpe salýǵa múmkindik beremiz", - dedi Aleksei Tsoi "Habar 24" telearnasyndaǵy tikelei efir kezinde.
Onyń aitýynsha,ministrlikke balalardy virýstan qorǵaý úshin vaktsina tabý týraly kóptegen ótinish kelip túsip jatyr.
"Ókinishke qarai, qazir tek eresek adamdar ǵana vaktsina saldyra alady, balalarǵa kómektesýge múmkindigimiz joq. Qazirgi ýaqytta 12 jastan bastap Pfizer vaktsinasyn saldyrýǵa keńes berilýde. Azamattar bul máseleni ózderi sheshedi, biraq biz vaktsinalaýǵa shaqyramyz, óitkeni ol kómektesedi. Ókinishke qarai, jańa shtammen balalar da aýyrady", - dedi ministr.
Sonymen qatar ministr qazaqstandyq QazVac vaktsinasyn balalarǵa salyp synaqtan ótkizýge qatysty suraqqa jaýap berdi.
"Bizdiń zańnamada ekpeni balalarǵa salyp, synaqtan ótkizýge tyiym salynǵan. Sondyqtan QazVac boiynsha mundai zertteý júrgizilip jatqan joq", - dedi Tsoi.
19 shildede ótken keńeste memleket basshysy Qasym-Jomart Toqaev QazVac vaktsinasyn Dúniejúzilik densaýlyq saqtaý uiymynda tirkeýdi jedeldetýdi tapsyrǵan edi.
