"Qazaqstan jastary kongresi" zańdy tulǵalar birlestiginiń direktory Toqtar Bolysov bala týǵany úshin ipoteka qaryzyn óteýdi usyndy, dep habarlaidy Sputnik Qazaqstan.
Onyń aitýynsha, kóp balaly analardyń járdemaqysyn birneshe esege ósirip, óńirdegi ortasha jalaqymen teńestirý kerek.
"Jas otbasy ipoteka alǵannan keiin, birinshi sábii dúniege kelgende, ipotekalyq qaryzy 25 protsentke tómendesin. Ekinshisi týǵanda taǵy 25%-ke, úshinshi balasy bolǵanda taǵy 25%-ke. Al tórtinshi bala týyp, otbasy kóp balaly atanǵanda, memleket qaryzdy tolyǵymen japsyn", - degen usynys tastady Bolysov senatta ótken dóńgelek ústelde.
Memleket jeńildik usynǵan jaǵdaida, tym qymbat páterlerdi satyp alýǵa jol bermes úshin bir adamǵa 18 sharshy metr paidaly turǵyn úi aýmaǵyn bólý usynyldy.
"Alǵashqy eki pýnkt júzege asqannan keiin ata-analardyń jaýapkershiligine qatysty zańnamany qatańdatý kerek. Kóp balaly otbasylarǵa jaǵdai jasalǵannan keiin ǵana, balalardyń quqyǵyn qorǵaý salasy qatań baqylaýǵa alynýy tiis", - dedi ol.
Sonymen qatar Bolysov mektepterde psihologtar daiarlaý máselesine de toqtaldy. Aitýynsha, búginde psihologtardyń biliktiligi tómen.
"Bilim berý mekemelerinde psihologtardy oqytý men olardyń mártebesin qaita qaraý qajet. Tek sonda ǵana jastar arasyndaǵy qylmysty azaita alamyz. Al qazir ol barlyq qylmystyń 50 protsentin qurap otyr", - dedi ol.
