«Aýyl» partiiasynyń músheleri «Bala násibi» atty járdemaqy taǵaiyndaýdy usyndy, dep habarlaidy "Ult aqparat".
«Aýyl» HDPP ortalyq apparatynyń jetekshisi Qýanysh Seiitjanovtyń aitýynsha, Qazaqstanda muqtaj nemese muqtaj emes dep bólmei, balalardyń bárine birdei járdemaqy taǵaiyndaý kerek.
«Halyqtyń amanat etken saýaldarynyń biri («El amanaty» saýalnamasy) – áleýmettik salada, partiia usynyp otyrǵan ár balaǵa járdemaqy taǵaiyndaý týraly bastama. Demek, qoǵamda bul problema burynnan bar. Partiianyń buǵan deiingi ótkizgen is-sharalarynda bul másele talqylanǵan. Árine qazirgi tańda ana men balany qoldaý salasynda áleýmettik járdemaqynyń neshe túri joq emes – bar. Belgili bir deńgeide bul járdemaqynyń túrleri keide bir-birine qaishy kelip te jatady. Máselen, bir ǵana ana men balaǵa arnalǵan járdemaqy 14 túrli zańmen retteledi eken. Bul belgili bir deńgeide halyqty shatastyryp jatyr», - dedi Qýanysh Seiitjanov OKQ-da ótken «Aýyl» partiiasynyń baspasóz máslihatynda.
Onyń aitýynsha keiinnen taǵaiyndalǵan ataýly áleýmettik kómektiń de qaishylyqtary joq emes.
«Máselen Qazaqstanda 776 myń adam ataýly áleýmettik kómekti alsa, sonyń 492 myńy balalarǵa arnalǵan ataýly áleýmettik kómek eken. Biz nege balany jas kúninen biri áleýmettik kómekke muqtaj, ekinshisi muqtaj emes dep bólýimiz kerek? Bul – ideologiialyq mazmun turǵysynan da óte qate. Óitkeni biz balanyń janyn jasynan jaralaimyz. Muny dana halqymyz «Ár balanyń óz nesibesi bolady» dep biraq aýyz sózben aitqan. Bizdiń ustanyp otyrǵan pozitsiiamyz – 18 jasqa deiingi balalardy áleýmettik kómekke muqtaj nemese muqtaj emes dep bólmei, tólemaqy taǵaiyndaý. Buǵan elimizdiń ekonomikalyq múmkindikteri jetkilikti. Bul usynysty kókten alǵan joqpyz. Saraptamanyń nátijesinde usynyldy. Áleýmettik tólemge keler bolsaq, Asan men Úsenniń ertegisi eske túsedi. Bala qashan da bala. Ol bizdiń bolashaǵymyz», - dedi ol.
«Aýyl» partiiasynyń músheleri bul járdemaqyny «Bala násibi» dep ataýdy usynyp otyr.
