Áleýmettik mańyzy bar azyq-túlik taýarlary eń qatty qymbattaǵan óńirlerdiń aldyna Pavlodar oblysy men Nur-Sultan qalasy shyqqan. Bul týraly Saýda jáne integratsiia vitse-ministri Azamat Asqaruly málim etti, dep habarlaidy "Ult aqparat".
«Halyqty alańdatyp otyrǵan mańyzdy máselelerdiń biri - azyq-túlik baǵasy. Tótenshe jaǵdai kezinde biz 9 áleýmettik mańyzy bar azyq-túlik taýarlarynyń (kúrish, un, qaraqumyq, nan, jumyrtqa, kúnbaǵys maiy) shekti baǵasyn belgiledik. Naryqtyq ekonomikada taýarlar baǵasy suranys pen usynystyń balansymen anyqtalady. Degenmen bul memlekettiń yqpal etý tetigi joq degendi bildirmeidi. Áleýmettik mańyzy bar azyq-túlik taýarlaryna baǵany turaqtandyrý máselesi Úkimet, ortalyq jáne jergilikti basqarý organdarynyń turaqty baqylaýynda», - dedi Azamat Asqaruly OKQ-da ótken baspasóz máslihatynda.
Onyń aitýynsha, jyl basynan 21 shildege deiin azyq-túlik taýarlarynyń baǵasy 5,7 paiyzǵa ósken. Áitse de bul sońǵy bes jyldaǵy rekordtyq ósim dep aitýǵa kelmeidi. Azamat Asqaruly 2016 jyly bul kórsetkish birden 9,1 paiyzdyq, al 2019 jyly 7,7 paiyzdyq ósimdi kórsetkenin aitady.
«Degenmen keiingi úsh aida baǵanyń edáýir turaqtalǵany baiqalady. Mamyr aiynda baǵa ósimi 0,1 paiyzdyq ósimdi kórsetse, maýsymda ósken joq. Shildeniń alǵashqy úsh aptasy 0,1 paiyzdyq baǵa ósimimen aiaqtaldy. Áleýmettik mańyzy bar azyq-túlik taýarlary baǵasynyń eń joǵary ósimi Pavlodar (+11,9%) men Nur-Sultan (+11,8%) qalalarynda tirkeldi. Al eń tómengi ósim Almaty (+3,1%), Petropavlov (+4,7%) men Aqtaý (+4,8%) qalasynda baiqaldy. Jyl basynan beri áleýmettik mańyzy bar azyq-túlik taýarlary ishinde eń qymbattaǵandary - kartop (+43,3%), sábiz (+31,4%), sarymsaq (+20,3%) qaraqumyq jarmasy (+19,0%), qant (+10,7%) pen kúnbaǵys maiy (10,2%). Al baǵasy tómendegen azyq-túlik qataryna oramjapyraq (- 23,3%), jumyrtqa (-7,2%), kúrish (-7%), taýyq eti (-2,9%) men tuzdy (-1%) jatqyzýǵa bolady», - deidi ol.
