Qazaqstanda azyq-túlik taýarlarynyń óndirisi toqtamaidy jáne esh tapshylyq kútilmeidi. Bul týraly QR AShM Agrarlyq azyq-túlik naryqtary, organikalyq ónim jáne tehnikalyq retteý departamenti direktorynyń mindetin atqarýshy Sáýle Jurynova aityp berdi, dep habarlaidy QazAqparat.
«Qazirgi ýaqytta AShM áleýmettik mańyzy bar 32 azyq-túlik taýarlary boiynsha óńirlerdiń qamtamasyz etilýine monitoring júrýde. Bul monitoring ár apta saiyn turaqtandyrý qorlarynda, iri saýda júielerinde, jetkizýshilerdiń jáne qaita óńdeý kásiporyndarynyń qoimalaryndaǵy qorlardy eskeredi. Óńirlerdiń jedel derekteri boiynsha, biylǵy 16 qazanda respýblikada 1,9 mln azyq-túlik taýarlarynyń qory bar. Onyń ishinde turaqtandyrý qorlarynda – 25,3 myń tonna, óndirýshi kásiporyndarda – 1,6 mln tonna, qoimalarda – 137 myń tonna, saýda jerlerinde – 172 myń tonna, budan basqa 813,2 mln dana jumyrtqa jáne 10,9 mln tonna azyq-túlik bidaiy bar», - dedi spiker Ortalyq kommýnikatsiialar qyzmetinde «KVI jaǵdaiynda azyq-túlik ónimderiniń baǵasyn retteý jáne azyq-túlik qaýipsizdigin qamtamasyz etý týraly» baspasóz máslihatynda.
Qolda bar ónim qorlary tez buzylatyn ónimder boiynsha bir aptaǵa, basqalary boiynsha – birneshe aiǵa jetetinin kórsetedi.
«Azyq-túlik taýarlarynyń óndirisi toqtamaidy jáne qorlar únemi jańartylyp, tolyqtyrylyp otyrady. Sondyqtan, olar boiynsha tapshylyq joq jáne kútilmeidi.
Qazirgi ýaqytta dándi jáne dándi-burshaq daqyldaryn jinaý 99,8 paiyzǵa aiaqtaldy. Jinalmaǵan azdaǵan júgeri men kúrish alqaptary ǵana bar. Osy kúnderi 20,5 tonna astyq bastyryldy. Jinalǵan dándi jáne dándi-burshaq daqyldarynyń kólemi elimizdiń ishki qajettiligin tolyq qamtýǵa jáne 7,8 mln tonna astyqtyń eksporttyń áleýmetin iske asyrýǵa jetkilikti», - dedi Sáýle Jurynova.
