Saýda jáne integratsiia ministri Baqyt Sultanov qazaqstandyqtardy azyq-túlik baǵasyn baqylaýǵa tartýdy usyndy, dep habarlaidy Sputnik Qazaqstan.
Ministr taýar baǵasynyń ósýine ýaqytyly den qoiý úshin ózekti aqparattar jedel alynýy qajet ekenin aitty. Búginde Statistika komiteti apta saiynǵy negizde ár seisenbi saiyn áleýmettik mańyzy bar azyq-túlik taýarlarynyń baǵasyna qatysty aqparat jinaqtaidy. Resmi statistikalyq derekter ár beisenbi kúni jariialanyp turady.
"Damyǵan elderde baǵany monitoringileýge halyq tartylǵan. Iaǵni, kez-kelgen azamat taýardyń baǵasyn sýretke túsirip, áleýmettik mańyzy bar azyq-túlik baǵasynyń statistikasy jinaqtalatyn arnaiy portalǵa jibere alady. Bul júie arqyly dúkenderdegi taýarlardyń qunyn onlain rejimde baqylaýǵa bolady", - dedi Sultanov úkimet otyrysynda.
Ol eger úkimet bul usynysty qoldasa, ministrlik ózge de quzyrly organdarmen birlesip, júieni qysqa merzimde engizýge daiyn ekenin atap ótti.
Úkimet basshysy Asqar Mamin saýda ministriniń bastamasyn qoldady.
"Baǵalar boiynsha jedel aqparat almasý erekshe mańyzdy ekenin eskerip, saýda jáne integratsiia ministrliginiń biryńǵai onlain-platformasyn qurý týraly usynysyn qoldaimyn", - dedi premer-ministr.
