Qazaqstanda azamattardy áskerge shaqyrý ýchaskelerine tirkeý bastaldy, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
«Azamattardy shaqyrý ýchaskelerine tirkeý – bul jastardy áskeri esepke qoiý, olardyń sanyn, áskeri qyzmetke jaramdylyq dárejesin, bilim deńgeiin, alǵan mamandyǵy men dene shynyqtyrý daiyndyǵyn anyqtaý úshin tiisti jergilikti atqarýshy organdar men jergilikti áskeri basqarý organdarymen birlesip júrgizetin áskeri esepke alý is-sharalary. «Áskeri qyzmet pen áskeri qyzmetshilerdiń mártebesi týraly» Qazaqstan Respýblikasynyń Zańy negizinde Qazaqstanda biyl on jeti jasqa tolǵan azamat áskerge shaqyrý ýchaskesine tirkelýi tiis» dep málim etti ministrlikten.
Tirkeý kezeńinde jastarmen áńgimelesý, áskeri qyzmetke jaramdylyǵyn rastaityn meditsinalyq tekserý júrgizilip, qajetti qujattar tekseredi. Eger tirkeý protsesinde emdelýge (meditsinalyq baqylaýǵa) muqtaj áskerge shaqyrylýshylardy anyqtasa, onda olardy emdeý-aldyn alý uiymdaryna tirkeidi.
Áskeri esepke alǵash ret turǵan azamattarmen qorǵanys isteri jónindegi basqarmalarda (bólimderde) Qorǵanys ministrliginiń áskeri oqý oryndary boiynsha úgit jumysy júrgiziledi jáne kelisimshart boiynsha áskeri qyzmettiń perspektivalary túsindiriledi.
Azamattardy shaqyrý ýchaskelerine tirkeý aǵymdaǵy jyldyń qańtar aiynan naýryz aiyna deiin jalǵasady. Qazaqstan boiynsha áskerge shaqyrylýshylardy áskeri esepke 100 000-ǵa jýyq adamdy qabyldaý josparlanyp otyr.
