Ulttyq tasymaldaýshy halyqtyń suranysyn eskere otyryp, 2022 jyldyń 1 aqpanynan bastap áielder vagondary bar poiyzdardyń sanyn kóbeitý týraly sheshim qabyldady, dep habarlaidy QazAqparat «Qazaqstan temir joly» UK» AQ baspasóz qyzmetine silteme jasap.
Joba pilottyq rejimde áielderga arnalǵan vagondar taǵy:
1) № 45/46 «Pavlodar - Shymkent»;
2) № 85/86 «Nur-Sultan-1 - Shymkent»;
3) № 37/38 «Mańǵystaý - Nur-Sultan - Nurly jol - Semei»;
4) № 47/48 «Nur-Sultan - Nurly jol - Atyraý»;
5) № 379/380 «Almaty-2- Oral»;
6) № 73/74 «Almaty-2 - Jezqazǵan» baǵyttary boiynsha júretin jolaýshylar poiyzynda jumys isteidi.
Internet-saittarda jáne bilet kassalarynda áielder vagondaryna temirjol biletterin resimdegen kezde jolaýshylar muqiiat bolyp, shartty belgilerge nazar aýdarýy tiis.
Áielder vagondaryna ertip júretin adam bolǵan kezde 7 jasqa deiingi erkek jynysty balalardy resimdeýge de jol beriledi. Jol júrý barysynda suraqtar týyndaǵan kezde jolaýshylar óz vagonynyń jolserigine nemese poiyz bastyǵyna júgine alady.
Esterińizge sala keteiik, ótken jyldyń qazan aiynda klientke baǵdarlaný jáne servis deńgeiin arttyrý úshin «Jolaýshylar tasymaly» AQ №77/78 «Almaty – Mańǵystaý» jáne №351/352 «Almaty–1 - Óskemen» jolaýshylar poiyzdarynda áielder vagondarynda jol júrý qyzmetin iske qosty.
«Joba iske qosylǵan sátten bastap, 2021 jylǵy 10 qazan men 31 jeltoqsan aralyǵynda bul qyzmetti 13243 áiel jolaýshy paidalanǵan», - delingen habarlamada.
